Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд иргэн Д.Мөнх-Эрдэнэд холбогдох шүүх хурал эхэлсэн. Энэ үеэр Д.Мөнх-Эрдэнэ “Миний амьдралыг шийдэх гэж байгаа учир өмгөөлөгч нэмж авахыг хүсэж байна” гэв. Мөн түүний өмгөөлөгч Д.Мөнх-Эрдэнийн нэр дээрх 82 сая төгрөгийн хохирлыг шүүхийн дансанд байршуулж, цагдан хорих таслан сэргийлэх арга хэмжээг өөрчилж батлан даалтад гаргах саналыг гаргасан. Мөн түүний шүүх хуралд УИХ-ын гишүүн С.Ганбаатар, АН-ын дэд дарга Д.Ганбаяр ажиглагчаар оролцож байгаа аж.

Дашрамд дурдахад, Д.Мөнх-Эрдэнийг Хөх хотод суух ерөнхий консулаар ажиллаж байхдаа эрх мэдэл, албан тушаалын байдлаа урвуулан ашиглаж өөртөө болон бусдад давуу байдал бий болгосон, төсвийн хөрөнгийг зориулалтын бусаар зарцуулсан, бусдын нэр төр, алдар хүндэд халдсан илт худал мэдээллийг олон нийтэд тараасан, хууль сахиулагчийг албан үүргээ биелүүлэхтэй нь холбогдуулан хүч хэрэглэж эсэргүүцсэн зэрэг хэрэгт буруутгаад байгаа билээ.