Дархан-Уул аймагт “Тэс” петролиум ХХК-ийн шатахууны агуулах дэлбэрч, өчигдөр 18:44 цагт галыг Онцгой байдлын албаныхан бүрэн унтраасан. Ослын улмаас нэг иргэн амиа алдаж, хоёр иргэнийг эрэн хайх ажиллагаа үргэлжилж байгаа. Энэ талаар Дархан-Уул аймгийн Онцгой байдлын газрын мэргэжилтэн С.Сарангаас тодрууллаа. Тэрбээр “Одоогийн байдлаар Онцгой байдлын газрынхан устай холилдсон АИ-92 шатахууныг агуулахаас шавхаж, хоёр иргэний цогцсыг хайж байгаа. Учир нь, гадна талбайгаас тэдний цогцос олдоогүй учир дээрх арга хэмжээг авч байгаа. Агуулахыг суллаж дууссаны дараа эрэн хайх ажиллагааг зогсоох эсэхийг шийднэ. Шатахууны агуулах дэлбэрэхэд нягтлан, нярав, хамгаалалтын ажилтан ажиллаж байсан” гэлээ.