Есдүгээр  сарын 1. Эрдэмд  шамдах  их  үйлсэд тэмүүлсэн бяцхан  сурагчид аав, ээжийнхээ  гараас хөтөлсөөр номын их өргөө рүүгээ алхаж байна. Хоёр жил  гаруй хугацаанд гэртээ “хоригдсон” хүүхдүүд сургуулиа, ангийнхныгаа, багшийгаа санасан гэж жигтэйхэн хөөр баяраар дүүрэн сургуулийнхаа хаалгаар гүйсээр орлоо. Сурагчийн дүрэмт хувцсаа өмсөж, шинэхэн  цүнхээ үүрсэн тэд хачин их баяртай байна. Өнгөрсөн хоёр жилийн хугацаанд өөрт нь тохиолдсон сонин, хачин зүйлээ ам уралдан ярьсаар, зарим нь ангийнхнаасаа бишүүрхсээр ширээндээ суулаа.

Сургуулийн босго дөнгөж алхаж байгаа нэгдүгээр ангийн сурагчид дүрэлгэр алаг нүдэндээ нулимс бөмбөрүүлж, зарим нь инээсээр, хөөрсөөр сурагч боллоо. Өнгийн цэцэгс  барьж, өөрөөсөө том цүнх үүрсэн тэд эргэн эргэн харсаар, багшдаа хөтлүүлсээр анги руу явлаа. Оройгүй эрдмийн оройд нь хүрэх их үйлсдээ

Сурагчийн дүрэмт хувцсаа өмсөж, шинэхэн  цүнхээ үүрсэн тэд хачин их баяртай байна.

 “Сахилгагүй” сурагчдаа, багш нараа,  ажилтнуудаа “санасан” сургууль одоо л нэг “амь” орж байгаа гэлтэй хүүхдийн инээдээр цалгиж, халгиж байна. Хоёр жил орчим хүлээсэн сургуулийн хонх өнөөдөр нижигнэтэл дуугарлаа.

           Хонх дуугарахтай зэрэгцэн Ерөнхийлөгч У.Хүрэлсүх хичээлийн шинэ жилийн нээлтэд зориулж, мэндчилгээ дэвшүүллээ. Тэрбээр “Эрхэм хүүхэд багачууд, сурагч, оюутан, багш сурган хүмүүжүүлэгч, эцэг эхчүүд та бүхэндээ хичээлийн шинэ жилийн мэндийг өргөн дэвшүүлье. Зуны амралт дуусаж, есдүгээр сарын 1-ний өдөр сургуульдаа очих гэж хүүхэд бүр яарч догдолдог. Дэлхий дахиныг хамарсан цар тахлын улмаас хоёр жил орчим танхимын сургалтаас холдсон болохоор та бүхэн маань сургууль танхимаа харах гэж, ангийн найз, багш нартайгаа уулзах гэж догдлон байгааг ойлгож байна.

Монголын ирээдүй болсон хүүхэд багачууд, оюутан залуусаа, монголчууд эртнээс эрдэм ном дээд баян хэмээн эрдэм номыг чухалчлан дээдэлж ирсэн билээ. Бие, хэл, сэтгэлээс хамгийн эрхэм нь сэтгэл юм. Хүний сэтгэл сурах мэдэхэд туйлбартай зүтгэх аваас зорьсон эрдэм, үйлс бүтдэг жамтай. Багш, оюутан, сурагчид, нийт ард иргэддээ хичээлийн шинэ жилийн баярын мэндийг өргөн дэвшүүлж, эрдмийн их үйлсэд нь өндөр амжилт хүсье" хэмээв.

           Харин Боловсрол, шинжлэх ухааны сайд Л.Энх-Амгалан “Хэдийгээр цар тахлын хүнд хэцүү цаг үе боловч сурч боловсрох, хөгжиж дэвжих боломжийг бид алдаж болохгүй. Урсан өнгөрч буй цаг мөч бүрийг ухрааж болохгүй учир хамтдаа хичээх, хамтдаа урагшлах хариуцлагатай үе ирж байна. Хамгийн том ачааллыг нуруундаа үүрэх багш нартаа, хариуцлагатайгаар хамтарч ажиллах аав, ээжүүддээ, хичээн зүтгэх оюутан залуус, сурагч багачууддаа хичээлийн шинэ жилийн мэндчилгээ дэвшүүлье" гэжээ.

Алдрайхан бяцхан сурагчдадаа сурлагын өндөр амжилт хүсье.