Сонгинохайрхан дүүргийн 36 дугаар хороо Улаан чулуутын эцэст амьдардаг эгч, дүү хоёр өчигдөр 16:00 цагийн үед хашаандаа тоглож байгаад сураггүй болсон. Энэ талаар тэдний ээжээс тодруулахад“Өчигдөр 16:00 цагийн үед хоёр охин минь сураггүй болсон. Хашаандаа тоглож байсан охид минь 30 минут орчим гэртээ орж ирээгүй. Тэгээд “Хашаандаа тоглож байгаа болов уу” гээд хайтал байхгүй байсан. Сураггүй болохоосоо өмнөхөн “Дэлгүүр орж, тараг авна” гэж ярьж байсан. Гэрийнхээ ойролцоо дэлгүүрүүдээр хайж, камер шүүтэл автобусны буудал руу явсан бичлэг байна лээ. Тэгэхээр автобусанд суугаад явсан байх. Цагдаа нар автобуснуудын бичлэг шалгаж үзнэ гэсэн. Одоогоор бүх дүүрэгт эрэн хайх ажиллагааг үргэлжлүүлж байгаа. Том охин минь 11 настай, бор ноосон цамц, бүдэг ягаан өмдтэй. Бага охин долоон настай, улаан хослол, ягаан углааштай гэрээсээ гарсан” гэсэн юм.

     Харин охидыг олсон эсэхийг дахин тодруулахад “Баянгол дүүргийн дөрөвдүгээр хороо Гурвалжингийн гүүрний урд талд байрлах автобусны буудлын цайны газарт явж байхад нь олсон" гэлээ.