-Саид Моллайг Олимпын хотхондоо хүлээн авч уулзаж, баяр хүргэж, мөнгөн урамшуулал олгосон-

         “Токио-2020” зуны олимпын наадмын жүдо бөхийн төрөлд мөнгөн медаль хүртсэн  Саид Моллай Герман Улсаас тайлбар хийлээ. Түүний хэлснээр олимпын наадмаас медаль хүртсэн тамирчдад зориулан энэ сарын 13-нд баярын ёслолтой гэж хэлсэн ч тухайн өдөр хэн ч түүнд мэдэгдээгүй гэнэ. Энэ талаар Саид Моллай “Би бүхэл өдрийн турш зочид буудалдаа хүлээж байсан. Хэн ч намайг дуудаагүй. Монгол Улсын өмнөөс барилдаж, медаль хүртсэн ч Монголын үндэсний олимпын хороо, төр засгийн ямар ч хүн надад баяр хүргээгүй. Зарим хүн л хувиараа над дээр ирж, бэлэг гардуулж байсан. Надад шинэ эко машин бэлэглэсэн гэж хэлсэн. Гэсэн хэдий ч тэр автомашин нь 2010 оны автомашин байсан. Харин хүрэл медаль хүртсэн М.Уранцэцэг, Ц.Цогтбаатар хоёрт мөнгөн урамшуулал, байр бэлэглэсэн. Надад мөнгөн урамшуулал, байр бэлэглэсэн гэдэг бол худал мэдээлэл. Намайг байр, мөнгөөр урамшуулаагүй. Миний өнгөрсөн амьдрал хүнд, хэцүү байсан. Надад урамшуулал, туслалцаа хэрэгтэй байсан. Тэгвэл би гэр бүлдээ тусалж чадна” гэсэн юм.

Бид түүний тайлбартай холбогдуулан Монголын үндэсний олимпын хорооны ерөнхийлөгчийн үүргийг түр орлон гүйцэтгэгч Ч.Наранбаатараас тодруулга авлаа.

         Тэрбээр “Саид Моллайг бид хамгийн түрүүнд Олимпын хотхондоо хүлээн авч уулзаж, баяр хүргэж, мөнгөн урамшуулал олгосон. Бид өөрсдийн боломжоороо олимпын наадмаас медаль хүртсэн тамирчдад мөнгөн урамшуулал олгосон шүү дээ. Тэрнээс хойш Саид Моллай тамирчинтай уулзаагүй байна. Наймдугаар сарын 23-нд манай хорооны гүйцэтгэх зөвлөлийн хурал болно. Энэ үеэр олимпын наадамд оролцсон тамирчдыг хүлээн авч, Олон улсын олимпын хорооноос ирсэн батламж, тэмдэг, үнэмлэхийг гардуулж өгөх тов гарна. Наймдугаар сарын 13-нд ямар ч үйл ажиллагаа болоогүй. Саид Моллайг ХБНГУ руу явахаас нь өмнө Олон улсын олимпын хорооноос ирсэн батламж, тэмдэг, үнэмлэх гардуулж өгөх боломж байгаагүй. Цаанаас тэмдэг, үнэмлэх ирэх хооронд Герман руу явчихсан байна лээ. Саид Моллайгийн гаргаж байгаа гомдол, тэмцлийг нь цаанаас нь бодлогоор хийлгэж байгаа байх. Бид өөр  өөрсдийн ажлын хийгээд л явж байна” гэв.