Увс аймгийн Ховд сумын Ховд багт зургадугаар сарын 14-ний өдрийн 11:00 цагийн орчим иргэн 46 настай, эрэгтэй Л согтууруулах ундаа хэрэглэсэн үедээ сураггүй болсон.

Тухайн үед сураггүй болсон иргэнийг Ховд голд осолдсон байж болзошгүй дуудлагыг ОБЕГ зургадугаар сарын 22-ны өдрийн 14:50 цагт хүлээн авсан.

Тус сумын Цагдаагийн тасагт тухайн иргэнийг сураггүй болсон тухай мэдээлэл зургадугаар сарын 17-ны өдөр ирсэн бөгөөд зургадугаар сарын 17-21-ний өдрүүдэд орон нутгаас эрэн хайх ажиллагааг зохион байгуулсан боловч үр дүнд хүрээгүй. 

Увс аймгийн Онцгой байдлын газрын Эрэн хайх, аврах салбар, тус сум дахь Цагдаагийн хэсгийн алба хаагчид, сумын ЗДТГ-ын ажилтнууд, ар гэрийнхэн иргэн Л-ийг эрэн хайх ажиллагааг зургадугаар сарын 23-ны өдрийн 07:00 цагаас мөн өдрийн 23:30 хүртэл зохион байгуулсан байна.

Зургадугаар сарын 23-ны өдрийн байдлаар хоёр бүлэгт хуваагдан нэгдүгээр бүлэг Ховд сумын төвөөс тус сумын нэгдүгээр багийн Индэрт гэх газар хүртэл 11 километрт, мөн сумын нэгдүгээр багийн Индэрт гэх газраас Гурван-Ам гэх газар хүртэл есөн километрт, нийт 20 километр газарт Ховд голын усанд завиар урсаж, 3-5 метрийн гүнд гурван удаагийн шумбалт хийжээ.

Хоёрдугаар бүлэг Ховд сумын төвөөс мөн сумын нэгдүгээр багийн Индэрт гэдэг газар хүртэл 14 орчим километрт, Индэрт гэх газраас Гурван-Ам гэх газар хүртэл таван километрт, нийт 19 километр газарт Ховд голын сав дагуу явганаар болон автомашинтайгаар самналт хийсэн боловч үр дүнд хүрээгүй тул эрэн хайх ажиллагааг мөн өдрийн 23:30 цагт түр зогсоосон. 

Эрэн хайх ажиллагааг өнөөдөр буюу зургадугаар сарын 24-ний 07:00 цагт дахин эхлүүлжээ.