Дорнод аймагт коронавирусийн халдвар илэрч, гамшгийн үеийн шар түвшинд шилжээд байгаа билээ. Улаанбаатар хотын харьяат, Тод манлай уяач, Хөдөлмөрийн баатар Д.Даваахүү нь энэ сарын 9-ний өдөр батлагдсан тохиолдлын нэгдүгээр хавьтал болсныхоо дараа Дорнод аймгийн Хөлөнбуйр суманд очжээ. Түүнийг ойрын хавьтал болсон тул шинжилгээ авахад халдвар авсан нь батлагдсан гэнэ. Д.Даваахүү уяачийг Хөлөнбуйр суманд хурдан морь авахаар хулгайн замаар очсон талаар зарим хэвлэл мэдээлж байгаа билээ. Халдвар илэрсэн Тод манлай уяач Д.Даваахүүгээс зарим зүйлийг тодрууллаа. Түүний зорчсон Хөлөнбуйр суманд найм хоногийн “тэг” зогсолт хийгээд байгаа.

-Таны бие давгүй юу. Хэнтий аймгийн Нэгдсэн эмнэлэгт эмчлүүлж байгаа юу?

      -Миний бие давгүй байгаа. Бага зэрэг ханиаж байна. Бусдаар ердөө давгүй шүү. Халдвартай гэж батлагдсан өдөр ХӨСҮТ рүү зөөвөрлөгдөж ирсэн. Одоо ХӨСҮТ-д эмчилгээ хийлгээд байж байна.

-Таныг хулгайн замаар Дорнод аймагт очсон гэх мэдээлэл байна. УОК-ын шийдвэрийн дагуу орон нутаг руу иргэдийг зорчуулахгүй байгаа шүү дээ. Та яаж Дорнод аймагт очсон юм бэ?

     -Нэгдүгээрт, надад хулгайн замаар зорчих шаардлага байхгүй. Зөвшөөрөлтэй зорчсон, энэ бүхнийг илтгэх бичиг баримт нь цагдаагийн газарт байгаа. Би хулгайн замаар нэвтрээгүй бөгөөд холбогдох бичгийг үзүүлж замын постоор дамжин өнгөрсөн.  

-Та Улаанбаатар хотоос гарахдаа шинжилгээ өгсөн үү?

     -Өгөлгүй яах вэ. Гурван удаагийн сөрөг гэсэн шинжилгээний бичигтэй Улаанбаатар хотоос гарсан.

-Таныг Хэнтий аймагт очоод халдвартай иргэний ойрын хавьтал болсон гэсэн. Энэ үнэн үү?

       -Би Улаанбаатар хотоос Дорнод аймаг руу явах гээд шинжилгээ өгөх цэгт очсон юм. Шинжилгээний цэгт таньдаг хүнтэйгээ таарсан. Тэр хүн Хэнтий аймагт амьдардаг болохоор нутаг руугаа явах шинжилгээ өгч байсан юм. Тэр хүний ч шинжилгээний хариу сөрөг гарсан гэсэн. Тэгээд бид маргааш нь хамт замд гарч, орой нь тэднийд хоноод, Дорнод аймаг руу хөдөлсөн. Хоёр хоногийн дараа халдвартай иргэний ойрын хавьтал болсон гээд намайг тусгаарласан. Тэр хүнээс маргааш нь халдвар илэрсэн гэсэн.

-Та вакцин хийлгэсэн байсан уу?

      -Тийм ээ, эхний тунгаа хийлгэчихсэн байгаа. Хоёрдугаар тунгаа дөрөвдүгээр сарын 30-нд хийлгэнэ. Вакцины эхний тунгаа хийлгээд халдвар авчихлаа.

-Хурдан морь авахаар очсон гэж үнэн юм уу?

      -Би өөрөө хурдан морьтой байж хэнээсээ дахиад морь авах билээ. Миний адуу Дорнод аймагт байдаг юм. Адуугаар эргэх санаатай Хөлөнбуйр суманд очоод халдвар авсан гээд буцаад ирчихлээ.