Сар шинийн баяраар нийслэлд хөл хорио тогтоох эсэх талаар тодорхой шийдвэр гараагүй байна. Өчигдөр УОК-ын хуралдаанаар дээрх асуудлыг хэлэлцэж, эрдэмтдийн зөвлөл энэ сарын 10-20-ны хооронд Улаанбаатар хотод хатуу хөл хорио тогтоож, цар тахлаас урьдчилан сэргийлэх ажлуудыг үргэлжлүүлэх шаардлагатай гэдэг байр сууриа илэрхийлсэн. Мөн Эрүүл мэндийн яамнаас хөл хорио тогтоох шаардлагатай гэсэн саналыг УОК-т хүргүүлээд байгаа юм.

Энэ асуудлыг УОК дахин судлах шаардлагатай гэж үзээд түр хойшлуулсан. Мөн Нийслэлийн Засаг дарга бөгөөд Улаанбаатар хотын захирагч Д.Сумъяабазар Цагаан сараар хөл хорио тогтоох шаардлагагүй гэх байр суурийг илэрхийлсэн гэх мэдээлэл бий. Тэгвэл энэ талаар нийслэлийн Засаг даргын нэгдүгээр орлогч Ж.Сандагсүрэнгээс тодруулсан юм.

-Цаг сараар хөл хорио тогтоох асуудлаар НОК-оос ямар саналтай байгаа вэ. Хотын дарга хөл хорио тогтоох шаардлагагүй гэсэн байр суурьтай байгаа гэсэн, энэ үнэн үү?

-Хотын зүгээс аль болох бизнес эрхлэгчдийн үйл ажиллагааг хязгаарлахгүй гэх байр суурийг баримталж байгаа. Гэхдээ бид Эрүүл мэндийн яамнаас гаргасан саналыг үндэслэнэ. 

-Иргэдийн зүгээс танайд ямар нэг санал, гомдол хүргүүлсэн үү?

-Бид иргэдийн дунд судалгаа явуулж байгаа. Тодруулбал, ямар чиглэлээр бизнесээ явуулж байна. Хэдий хэмжээний нөөц бололцоогоо алдав, ямар асуудал тулгарч байна, цаашид яаж дэмжвэл үр дүнтэй байх вэ гэдэг судалгаа хийж байгаа. Аль болох бид эдийн засгаа дэмжих, иргэдийн амьжиргааг доройтуулахгүй байх чиглэлээр арга хэмжээ авахаар төлөвлөж байна. 

-Иргэн, аж ахуйн нэгжийн дунд судалгаа хийж байгаа гэлээ. Цаашид хэрхэх талаар шийдэлд хүрсэн үү?

-Энэ талаар хотын дарга албан ёсоор байр сууриа илэрхийлэх байх.