АН-ЫН С.ЭРДЭНЭ МАН-ЫН НУУЦ ХҮНЭЭР “ЖИНХЛЭГДЭХ” ЦАГААР

Б. Бадралмаа:
Улс төр

2021-04-28, 1030

-ДЭЭД ШҮҮХ АНХНААСАА АН-ЫН ДАРГЫГ БҮРТГЭХГҮЙ БАЙХ ДААЛГАВАРТАЙ БАЙСАН УУ-

Ардчилсан намын дотоод хагаралд Улсын дээд шүүх оролцохгүй, “Өөрсдөө учраа ол” гээд хоёр даргыг нь бүртгэхээс татгалзчихлаа. Өөрөөр хэлбэл, цаасан болон цахим сонгуулийн дүнгээр ялалт байгуулсан О.Цогтгэрэл, М.Тулгат нарын аль алийг нь Улсын дээд шүүх Ардчилсан намын даргаар бүртгэхээс татгалзаж, С.Эрдэнийг намын даргаар үлдээв.

Энэ байдлаараа учир зүйгээ олохгүй байгаа Ардчилсан намынхан Ерөнхийлөгчийн сонгуульд ч оролцож чадахгүй хоцорч мэдэх нь. Үүнийг намын гишүүд ч, учир мэдэх хүмүүс удаа дараа сануулж байсан. Гэвч хоёр талцсан намын удирдлагууд дөргүй бух шиг өөр өөрсдийнхөөрөө зүтгэсээр өнөөдрийн байдалд хүргэчихсэн.

УИХ-ын ээлжит сонгуулийн дараа л намын дарга С.Эрдэнэ “Ардчилсан нам энэ удаагийн сонгуульд үнэмлэхүй ялагдал хүлээсэн нь дотоод эв нэгдэлгүй байдлаасаа боллоо. Би Ерөнхийлөгчтэй ойлголцож чадалгүй сонгуульд ялагдчихсан. Тийм ээ, бид энэ алдаагаа засаж, орон нутгийн сонгууль, цаашлаад Ерөнхийлөгчийн сонгуульд амжилттай оролцоно. Намын дүрмийн дагуу намын даргын тамга тэмдгээ Ц.Туваанд шилжүүлж, түр орлон гүйцэтгэгчээр сонгож байна” хэмээн мэдэгдээд намынхаа тамга тэмдгийг дэд дарга Ц.Туваанд хүлээлгэн өгсөн байдаг.

Гэвч орон нутгийн сонгуульд Ардчилсан нам бахь байдгаараа, хагарал, тэмцэлтэй оролцож ялагдал хүлээсэн. Цаашлаад намын дотоод маргаан эцэс төгсгөлгүй үргэлжилж, намын даргынхаа сонгуулийг ч хоёр тал зохион байгуулаад байв. Улмаар С.Эрдэнийн талаас М.Тулгат, Ц.Тувааны талаас О.Цогтгэрэл намын даргын сонгуульд ялалт байгуулсан.

Үнэндээ энэ бүх зохиол С.Эрдэнийн дүртэй МАН-ынхны найруулгаар маш амжилттай өрнөж байна. Эрх баригч намынхан 100 жилийнхээ том зорилтыг биелүүлэхээр Ардчилсан намынхан дунд “хэрүүлийн алим” шидээд буй. Эрх баригч намынхны ээлжит бай нь тус намын дарга асан С.Эрдэнэ. Тиймээс л тэрбээр намын даргын суудлаа хүлээлгэж өглөө гэж өөрийн биеэр албан ёсоор мэдэгдчихээд дахин гарч ирж, гол будилааныг үүсгэсэн хэмээн олон нийт үзэж буй. Угтаа бол С.Эрдэнийн гол зорилго Ардчилсан намыг хүчгүй, сул дорой байдалд хүргэж, Ерөнхийлөгчийн сонгуульд оролцуулах боломжгүй болгох зорилготой байсан гэдэг хардлага олны дунд бий. Ингэхдээ тэрбээр эрх баригч намтай тохиролцож, өөрийн хэргээ цайруулж байгаа гэдэг мэдээлэл ч бий.

Учир нь, С.Эрдэнийг Нийгмийн даатгалын ерөнхий газрын харилцах дансны жилийн эцсийн үлдэгдлийг Нийгмийн даатгалын санд буцаан төвлөрүүлээгүй, “Капитал” банканд давуу байдал олгож тус сангийн болон Эрүүл мэндийн даатгалын сангаас их хэмжээний мөнгө шамшигдуулсан гэх хэрэгт буруутгаад байсан. Түүнийг Нийгмийн даатгалын болон Эрүүл мэндийн даатгалын сангийн хөрөнгийг III зэрэглэлийн банканд байршуулснаас 230 гаруй тэрбум төгрөгийн хохирол учруулсан гэж үзэж, шалгаж байсан хэрэг нь дахин сөхөгдөж, үүнийгээ хаацайлахын тулд эрх баригчидтай далдуур гар барилцсан гэдэг. Тиймээс л намаа хүчгүй олгож, Ерөнхийлөгчийн суудлыг “бэлэглэх” ажилд голлон оролцсон гэж олон нийт хардаж буй. Харин Ц.Туваан талынхан Ерөнхийлөгчийн ээлжит сонгуульд одоогийн Ерөнхийлөгч Х.Баттулгыг өрсөлдөгчгүйгээр дэвшүүлнэ гэж хэт улайрсаар тэмцлийн хурцдуулж орхисон.

Одоо Ардчилсан намынхан эв зүйгээ олж, Ерөнхийлөгчийн сонгуульд нэр дэвшигчээ дотоод дүрмээрээ тодруулж чадах уу, үгүй юү гэдэг нь М.Тулгат, О.Цогтгэрэл нараас шалтгаална. Улсын дээд шүүхийн шийдвэрийн дараа буюу өчигдөр, О.Цогтгэрэл М.Тулгатад хамтарч ажиллах саналаа тавьсан. Үүнийг хүлээж авах эсэхийг өнөөдөр шийднэ. Тэдэнд учраа олоход хоёрхон хоногийн хугацаа үлдсэнийг сануулах нь зүйтэй биз.

Хуулийн хугацаагаар тооцвол Ерөнхийлөгчийн сонгуульд хэн өрсөлдөх вэ гэдэг нь ердөө долоо хоногийн дараа шийдэгдэх гэж байна. Тодруулбал, парламентад суудалтай намууд энэ сарын 30 гэхэд нам дотроосоо нэр дэвшигчдээ тодруулж, тавдугаар сарын 2-нд Их хурлаа танилцуулах зохицуулалттай. Ингээд намын Их хурлаас баталгаажуулсан нэр дэвшигчийг тавдугаар сарын 5 гэхэд Сонгуулийн ерөнхий хороонд нэр дэвшигчдээ бүртгүүлэх хуулийн зохицуулалт бий. Анхнаасаа Улсын дээд шүүхээр маргаанаа эцэслүүлнэ гэж өөрсдийнхөөрөө зүтгэсэн Ардчилсан намынханд яг ийм үр дүнд хүрэх зорилго байсан нь бараг ил болчихлоо.

АН-ЫН С.ЭРДЭНЭ МАН-ЫН НУУЦ ХҮНЭЭР “ЖИНХЛЭГДЭХ” ЦАГААР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2021-04-28 09:27:25

Buruugaa uursduusuu ha: Buruugaa uursduusuu hai za yu
Сэтгэгдэл үлдээсэн: 2021-04-28 09:26:22

Irgen : Buruugaa busdad ******** chih. Zahin har ovoohoi gedeg shig MAN buruutai yu.