МАН, МАХН 100 жилийн ойгоо хамтран тэмдэглэж буй. 100 жилийн баяртай холбоотой намын ахмад гишүүд МАН-ын удирдах зөвлөлийн төлөөлөлтэй уулзалт хийж, хоёр намыг нэгтгэх талаар саналаа илэрхийллээ.

Энэ үеэр МАН-ын нарийн бичгийн дарга Д.Амарбаясгалан "Намынхаа 100 жилийн ойг бид тодорхой хэмжээний амжилт бүтээлтэй угтаж байгаа. МАН-аас өрх тусгаарласан МАХН-ын дарга удирдлагууд бидэнтэй элгэмсэг хандаж, ойн баяраа хамтарч тэмдэглэх боломж бүрдлээ.

Сүүлийн үед хоёр нам нэгдэж, үйл ажиллагаагаа явуулах хэрэгтэй гэсэн санаачилгыг ахмад гишүүд болон намын гишүүд гаргаж байгаа. 100 жилийн ой хоёр намын хувьд чухал үйл явдал. Аливаа зүйл дээр харилцан ойлголцох нь чухал. Цаашид намын үзэл баримтлал, үнэт зүйл дээрээ ойлголцож, нэгдэх талаар ярилцаж байна. Хоёр намын удирдах зөвлөлөөс томилогдсон ажлын хэсэг гарч байгаа. Харилцан ойлголцох, гишүүдээс гарч байгаа саналыг авч үзэх, шат шатанд хэлэлцэх ажлыг зохион байгуулна. Ингээд намын гишүүд дэмжвэл цаашдаа хоёр нам нэгдэнэ" гэлээ.