Засгийн газрын ээлжит бус хуралдаан боллоо. Энэ үеэр Сангийн сайд Б.Жавхлан эрүүл мэнд эдийн засгийн хүрээнд хэрэгжүүлэх 10 их наяд төгрөгийн цогц төлөвлөгөөг хэрхэн хүртээмжтэй, богино хугацаанд зорилтонд хүрэх боломжтой талаар мэдээлэл хийлээ. Тэрбээр "Энэ сарын 10-нд Монгол Улсын Ерөнхий сайд болон засгийн газрын гишүүдтэй хамтран тус төлөвлөгөөг зарласан. Бид төлөвлөгөөндөө бодлогийн шилжилт хийсэн. Монгол Улс цар тахал гарсанаас хойш ард иргэдийнхээ эрүүл мэнд аюулгүй байдлыг нэгт тавьсан. Үүнээс цааш эдийн засгийн асуудлыг зэрэгцүүлж харилцан уядуулах шилжилт хийх шаардлагатай. Тийм учраас цогц арга хэмжээг давхар хэрэгжүүлэхээр Засгийн газар шийдлээ. Энэ цаг үеэс тактикаа өөрчилж ажиллахгүй бол хоёр, гуравдугаар улирлаас эхлэн эрүүл мэндийн салбарыг санхүүжүүлж чадахгүйд хүрэх эрсдэлтэй.

Сүүлийн нэг жилийн хугаацаанд эдийн засаг огцом зогссон. Хүнээр төлөөлүүлж үзвэл цусны эргэлт нь 60-70 хувь зогссон байна. 2010, 2011 онд эдийн засгийн өсөлт 17 хувь хүрч байсан. Энэ үед мөнгөний нийлүүлэлт 70 хувьтай байсан. Түүнээс хойших эдийн засгийн хэвийн өсөлттэй жилүүдэд мөнгөний нийлүүлэлт 30-45 орчим хувь байсан. 2020 оны жилийн эцсийн статистикийн тоон үзүүлэлтийг харахад 15 хувь хүртэл буурсан байна. Үүнийг эдийн засгийн дундаж өсөлттэй жилүүдтэй харьцуулахад гурав дахин буурсан байна. Тэгэхээр зайлшгүй эдийн засгийн мөнгөний эргэлтийг сайжруулах нь чухал байна. Банкнуудын зээл олголтыг нэмэгдүүлэх, 2021 онд батлагдсан төсөв, хөрөнгө оруулалт зохистой хэрэглэх, гадаадын хөрөнгө оруулалт нэмэх чиглэлээр ажиллахыг цогц хөтөлбөрт багтаасан” гэлээ.