Онцгой байдлын аврагчид утсаа гаргаад бичлэг хийх нь битгий хэл ар гэрийнхэндээ ч хэл дуулгах сөхөөгүй, нуруугаа тэнийлгэх завдалгүй түймрийн голомтод "шарагдаж", түлэгдэхийн наахнуур өдөр, шөнөгүй ажиллаж байхад УИХ-ын гишүүн С.Эрдэнэболд тэдний хажууханд зогсчихоод рийл хийж өөрийгөө рекламдаж байлаа. Аврагчдийн ажлыг ойлгож, хайрлаж, тэдний өмнөөс зүрх, сэтгэл нь зовдоггүй юм аа гэхэд Монголын уул, тал шатаж байхад “Би түймэр унтраалаа” гээд зургаа даруулаад зогсож байдаг зүрх зориг түүнээс л гарлаа. 

 Сум дамнасан түймрийн утаа, нутгийн иргэдийн айдас дунд зураг хөргөө даруулаад зогсох зориг энэ парламентын түшээгээс гарлаа гэсэн үг л дээ. “Түймэр унтраалцъя” гээд очсон нь сайхан ч гэлээ ганц цог ч унтраагаагүй юм уу гэмээр цэвэрхэн хувцас, цагаан бээлийтэй бичлэг хийлгээд зогсож байна. Зүгээр ч нэг зураг, бичлэг хийлгэлгүй "Би Дарханы гурван залуутай Сэлэнгэ аймгийн Зүүнбүрэн сумын  түймрийг унтраахад гар бие оролцлоо. Одоо үүрийн 05:00 цаг болж байна. Биднийг ирэхэд энэ хоёр уул бүхэлдээ шатаж байсан. Би 2017 онд Түнхэлийн түймрийг найзуудтайгаа унтраалцаж явсан. Онцгой байдлын аврагчид болон бусад хүмүүс шөнөжин надтай хамт түймэр унтраалаа” хэмээн попорч өгсөн байх юм. Яг үнэндээ УИХ-ын гишүүн С.Эрдэнэболдыг түймэр унтраалцахаар явсан юм уу, бичлэг хийж, өөрийгөө баатарлаг үйлс хийлээ гэж магтуулахын тулд, ард түмэндээ таалагдахын тулд явсан юм уу хэмээн түүний зураг, бичлэгийг харсан иргэд шүүмжлэлтэй хандаж байна. Түүний дээрх үйлдэл нь иргэдийн бухимдлыг төрүүлээд зогсохгүй Онцгой байдлын аврагчдыг доромжилсон, үл оошоосон явдал болж байна гэж үзжээ. 

     Үүний дараахан буюу өнөөдөр Шадар сайд, УОК-ын дарга С.Амарсайхан онгоцон дотор клипний зураг шиг зураг даруулчихаад “Ой, хээрийн түймрийн голомтод ажиллалаа” хэмээх тайлбартайгаар өөрийнхөө зургийг сошиалаар цацууллаа. Эсрэг талд нь орон нутгийн онцгойн ангийн аврагчид нь хуучны орос машинаа засаж, сэлбээд, элгээрээ хэвтэж байх юм. Могой алахад модны нэмэргүй гэдэг шиг түймэр унтраахад сайд, гишүүдийн зураг, рийлс хэрэггүй л баймаар юм даа.