Гэгээн Ширээт Улсын Гэгээн Петрийн талбайд манай улсын Гадаад харилцааны сайд шиг ганган хүн алга. Эмгэнэлийн индэрт “алтан” оосортой, тас хар нүдний шил, хээнцэр дэгжин эрээн алаг дээлтэй, ганган дээрээ гархитай ганцхан хүн яваа нь Б.Батцэцэг сайд байлаа. Гэгээн Ширээт Улсын төрийн тэргүүн агсан Пап Францистай салах ёс гүйцэтгэх ёслол Ватикан хотын Гэгээн Петрийн талбайд болсон юм л даа. Пап Францисыг сүүлчийн замд нь үдэх ёслолд дэлхийн 150 гаруй орны Төр, Засгийн тэргүүн оролцож, эмгэнэл илэрхийлж байхад манай улсын Гадаад харилцааны сайд Б.Батцэцэг л инээмсэглэл дүүрэн эрээн хураавар нь дэндсэн дэгжин “амьтан” дээгүүр сэлбэлзэж яваад иржээ. Энийгээ батлахын тулд хүндэтгэлийн суудал, төв талбайн индэрт зогсож байгаа зураг, бичлэгээ яамныхаа албан ёсны пэйж хуудаст оруулж байна. Тайлбарыг нь уншиж амжаагүй, эсвэл чадахгүй нэгэн харвал “Олон улсын хурал цуглаанд оролцжээ. Улсаа сурталчилах ажилд гарамгай оролцож, гадаад харилцааг олон өнгийн дээлээрээ зүлгэж байгаа нэгэн шүү” гэж сайшааж, саамшрахаар харагдана. Гэвч гашуудлын үйл ажиллагаанд оролцсон гэдгийг нь мэдвэл өмнөөс нь ичихээр, өмсөж яваа дэгжин дээл, татвар төлөгч биднээс ч үнэтэй “алтан” оосортой хар нүдний шилийг нь хуу татмаар санагдаж магад.

     Монголчууд бурхан болоочоо хүндлээд, оршуулгын ёслолд нь даруухан дээлтэй дэрийгээд зогсож байдаг ард түмэн. Гэтэл Гадаад харилцааны сайд нь хүндэтгэлийн суудалд хар нүдний шилтэйгээ, ярвайчихаад янзгүй сууна. Яг л урлаг, соёлын үзүүлбэр үзэж яваа ядуу улсын баян сайд шиг харагдаж байна лээ. Эсвэл аав, ээждээ эрхэлж, эдийн сайныг эдэлж, өнгөтэй өөдтэй болгоныг хамж өмссөн, хачин тансаг айлын эрх танхил охин наадам үзээд сууж байгаа юм шиг. Бүүр цаашлаад, Цагаан сарын барилдааныг дуртай, дургүй үзээд сууж байгаа бөхийн эхнэр ч юм шиг. Монгол Улсыг төлөөлж яваа Гадаад харилцааны сайд нь ганган байлгүй яах вэ. Гархи нэмсэн нь ч өөрийнх нь эрх. Гэхдээ гашуудлын үйл ажиллагаанд улсаа төлөөлж, хүндэтгэлийн суудалд эмгэнэн суугаагаа тэр мартжээ.

    Монгол Улс, Гэгээн Ширээт Улсын харилцааны түүхэнд анх удаа төрийн тэргүүний түвшинд Пап Францис манай улсад 2023 онд төрийн айлчлал хийсэн байдаг. Уг айлчлал хоёр улсын харилцаанд шинэ хуудас нээсэн чухал ач холбогдолтой болсон гэдгийг тухайн үед цохон тэмдэглэж байлаа. Төрийн айлчлалынхаа үеэр Пап Францис Монголын ард түмнийг сүсэг бишрэл, оюун санааны эрх чөлөөний бэлгэ тэмдэг хэмээн тодорхойлж, даян дэлхийн амар амгалан, энх тайвны төлөөх үйлсэд оруулж буй хувь нэмрийг өндрөөр үнэлж байсан нь түүх болж үлдлээ. Гэхдээ тэр монголчуудыг, Монголын төрийг, Гадаад харилцааны сайдыг тогос шиг гоёчихоод, өөрийг нь үдэж өгнө гэж мэдээгүй л болов уу. Хүний ёс, хүмүүний салах ёс яг ижилхэн. Гадаад харилцааны сайдын гайхуулах дон гашуудлын ёслолд ч шорвогдлоо.

     Б.Батцэцэг сайдыг айлчлал болгондоо өнгө өнгийн дээл зэхэж, ач холбогдол өгдөг гэдгийг мэднэ. Тэгэх ёстой гэж ойлгож, тиймээр нь ч хүндэлж ирсэн, монголчууд. Гэхдээ энэ удаагийн хувцаслалт, “алтан” оосортой, баяр, жаргалын цэнгээнд яваа юм шиг төрхийг нь ойлгох хүч дутлаа. Хүүгийнх нь хуримын ёслол, охиных нь хадаг, сүйний үйл ажиллагаанд оролцож явсан бол ойлгох байлаа. Бүүр браво гээд алга таших байлаа, Б.Батцэцэг сайд аа.