Эрх зүйн Гурван төгөлдөршил бодлогын хүрээнд УИХ-аас 60 гаруй ажлын хэсэг байгуулагдан ажиллаж байгаа. “Эрүү шүүлт тулгах гэмт хэргийн хохирогчийг хамгаалах, зөрчигдсөн эрхийг сэргээх, эрүүл мэнд, нийгэм, сэтгэл зүй, эд хөрөнгийн тусламж үйлчилгээ үзүүлэх, нөхөн төлбөр олгох талаар судалж, санал, дүгнэлт гаргах, шаардлагатай бол хохирол барагдуулах үйл ажиллагааны тухай хууль тогтоомжийн төсөл боловсруулах” үүрэг бүхий ажлын хэсэг өнөөдөр (2025.04.22) хуралдаж, судалгааны үр дүнтэй танилцлаа. Монголын Криминологичдын холбоо “Эрүүдэн шүүх гэмт явдлын шалтгаан, нөхцөлийг тогтоох нь” сэдвээр үндэсний судалгааг хийсэн нь манай улсын хувьд анхдагч цогц судалгаа болжээ. Төрийн бодлого шийдвэрт мэдээлэл өгөхүйц уг судалгаанд 832 иргэн хамрагдсан.Сүүлийн 7 жилийн хугацаанд эрүү шүүлттэй холбоотойгоор шүүхээр шийдвэрлэсэн 19 хэрэг, ХЭҮК болон Эрүү шүүлтээс урьдчилан сэргийлэх үндэсний ажиллагаанд иргэдээс ирүүлсэн гомдол, мэдээлэлд дүн шинжилгээ хийснээ тайлагналаа.