УИХ-ын чуулганы нэгдсэн хуралдаанаар Засгийн газрын шинэ сайд нарыг томилох асуудлыг хэлэлцсэн. Энэ үеэр УИХ-ын гишүүд сайд нараас асуулт асууж, үг хэллээ.

УИХ-ЫН ГИШҮҮН Б.БАЯРСАЙХАН: 26 жилийн дараа бид анх удаа бие даасан Соёлын яамтай болж байгаа. Соёлын яамыг нийт монголчууд тэр дундаа тархан суурьшсан монголчуудад хүртээлтэй байлгах хэрэгтэй. Ингэж байж бид ондоошлыг бий болгоно. Ч.Номин сайд Монгол HD телевизийн захирлаар ажиллаж байх хугацаандаа залууст чиглэсэн олон контент нэвтрүүлж байсан. Гэхдээ одоо бүхэл бүтэн улсын соёлын салбарыг удирдах гэж байна. Та хувиараа ямар нэг төсөл хөтөлбөр хийж, хэрэгжүүлж байгаа юу. Хоёрдугаарт, манайд уламжлалт соёлоо хөгжүүлж, хүүхдээ түүгээрээ хүмүүжүүлэх бодлогын алдаа байгаа. Энэ асуудалд яаж хандах вэ.

СОЁЛЫН САЙДАД НЭР ДЭВШИГЧ Ч.НОМИН: Миний хувьд ажлаа аваагүй байна. Тиймээс би салбараа сайн судалж, танилцах хэрэгтэй байгаа. 26 жилийн дараа Соёлын яамтай боллоо. Юун түрүүнд сууриа бэхжүүлэх хэрэгтэй. Сууриа сайн тавьчихвал хөдөө орон нутагт  соёлын өвийг түгээх ажлаа үргэлжлүүлнэ. Таны асуултад зургаан сарын дараа ажлаа аваад, ажлаа сайн мэдсэнийхээ дараа хариулъя гэж бодож байна.