УИХ-ын чуулганы нэгдсэн хуралдаанаар 32 дахь Ерөнхий сайдаар Л.Оюун-Эрдэнийг томилох тогтоолын төслийг хэлэлцэж байна. Энэ үеэр УИХ-ын гишүүд нэр дэвшигч Л.Оюун-Эрдэнээс асуулт, асууж үг хэллээ.

УИХ-ЫН ГИШҮҮД Ш.АДЬШАА: Л.Оюун-Эрдэнэ Ерөнхий сайдаар томилогдоод төмөр замын бүтээн байгуулалтын ажлыг цаашид үргэлжлүүлэх үү. Засгийн газрын мөрийн хөтөлбөрт тусгагдсан цахилгаан станц, нефтийн үйлдвэрийг үргэлжлүүлэх үү. Оюутолгойн гэрээг яаралтай цуцалж, ард түмний эрх ашигт нийцсэн гэрээ байгуулахыг цаашид би шаардах болно.

ЕРӨНХИЙ САЙДАД НЭР ДЭВШИГЧ Л.ОЮУН-ЭРДЭНЭ: Би Засгийн газарт хоёр удаа ЗГХЭГ-ийн даргаар ажиллаж, Засгийн газар, намын мөрийн хөтөлбөрийн багийн ахлагчаар ажилласан. Тиймээс бодлогын залгамж чанарыг үргэлжлүүлж, Ерөнхий сайд асан У.Хүрэлсүхийн бодлогоор ажиллана. Тавантолгой-Гашуунсухайт, Тавантолгой-Зүүнбаян чиглэлийн төмөр замыг яаралтай ашиглалтад оруулах шаардлагатай. Ингэж чадвал тээврийн зардлаас 600-900 сая орчим ам.долларыг хэмнэж, экспортын хэмжээ 30 орчим хувиар нэмэгдэнэ. Нефтийн үйлдвэрийг үргэлжлүүлэн барина. Үүнийг барьчихвал гадагшаа урсаж байгаа нэг тэрбум ам.долларыг дотооддоо хадгалах боломжтой. Тавантолгойн цахилгаан станц, Эрдэнэбүрэнгийн усан цахилгаан станцын ажлыг дуусгах төлөвлөгөөтэй байна. Оюутолгойн хэлэлцээр амаргүй нөхцөлд үргэлжилж байгаа. У.Хүрэлсүх Ерөнхий сайд Дубайн гэрээг өөрчлөх хатуу үүрэг өгсөн. Нэг жилийн хугацаанд ажлын хэсэг амаргүй нөхцөлд ажилласан. Энэ хугацаанд улстөржилт байсныг ч нуухгүй. Бид одоо хөрөнгө оруулагч талд гэрээг цуцлах хүсэлт гаргасан байгаа.