УИХ-ын гишүүн С.Одонтуяа ҮАБЗ-д шаардлага хүргүүлж байгаа талаараа өнөөдөр мэдээлэл хийлээ. Мөн Төрийн ордны хоёр давхарт “Бид эх орондоо ирмээр байна” суултыг зарлаж байгаагаа мэдэгдэв. Тэрбээр "Гаднын улсад маш олон иргэн коронавирусийн халдвар гарснаас хойш ирж чадахгүй байна. Өнгөрсөн хугацаанд тусгай үүргийн нислэг хэд хэдэн удаа хийгдсэн ч сүүлийн үед нислэг явсангүй. Товлосон нислэг нь цуцлагдсанаар олон иргэний амь нас, эрүүл мэнд эрсдэлд орж байна. Тухайлбал, БНСУ-аас эх орондоо ирэх хүсэлтэй 4000 гаруй иргэн бий. Үүнээс 1000 гаруй хүний асуудал хүнд байна. Тэнд олон хүн өлсгөлөн зарласан. Хүүхэдтэй, жирэмсэн, өвчтэй хүмүүс эх орондоо ирэх хүсэлтэй байгаа. Мөн эх орондоо ирэх гэж байсан нэг иргэн нас барсан харамсалтай хэрэг гарсан. Монгол Улсад хүний эрх зөрчигдөж байгааг зүгээр хараад сууж чадахгүй" гэв. Мөн ҮАБЗ-д гурван заалт бүхий шаардлага хүргүүлжээ. Шаардлагад:

• Эх орондоо буцах хүсэлтэй, шинжилгээний хариу сөрөг гарсан маш олон иргэд БНСУ, АНУ, Туркэд байгаа иргэдийг яаралтай татан авах,
• Буцах өдрөө хүлээн хоолгүй, амьдрах байргүй байгаа хүмүүсийн нөхцлийг анхаарах,
• Төлөвлөгөөт нислэгийн хуваарийг урьдчилан гаргаж, мэдээлэл өгөх ёстой гэжээ.