УИХ-ын чуулганы нэгдсэн хуралдаанаар Шүүхийн тухай багц хуулийн төслийн анхны хэлэлцүүлгийг хийж байна. Хуулийн төсөлтэй холбоотой гишүүд асуулт асууж, хариулт авч байна.

УИХ-ЫН ГИШҮҮН Л.ЭНХ-АМГАЛАН: Үндсэн хуульд шүүгч хараат бус байж хуульд захирагдана гэж заасан. Гэтэл бүх шүүгч хараат болсон байна. Шүүгч нар хуульд биш, эзэнд захирагддаг болсон. Гурван шүүгчийн нэг нь хараат шийдвэр гаргадаг байна. Монгол Улсын шүүхээр гарч байгаа нийт хэргийн 70 хувь нь хараат шийдвэр гаргаж байна гэсэн судалгаа байна. Бид хүний эрх хамгийн их зөрчигддөг Африкийн улсуудын өмнө жагсаж байгаа юм. Тиймээс бидний өнөөдрийн батлах хууль 560 шүүгчийн асуудал биш. Монгол Улсад шударга ёс тогтоох нийгмийн захиалгыг биелүүлэх гэж байна. Энэ хуулиар бүх иргэнийг шударга нийгэмд амьдрах эрх зүйн баталгааг бий болгох хэрэгтэй. Ингэж чадах уу.

УИХ-ЫН ГИШҮҮН С.БЯМБАЦОГТ: Үндсэн хуулийн нэмэлт, өөрчлөлтийг 2019 онд хийсэн. Энэ үеэр шүүхийн заалтад өөрчлөлт оруулж, Шүүхийн тухай хуульд өөрчлөлт оруулж байна. Шүүх шударга, шүүгч хараат бус байх зарчимд үндэслэж хуульд шинэчлэл хийж байна.