Эрүүл мэндийн яамны мэдээллийн үеэр сэтгүүлчид асуулт асуулаа. 

-Нийслэлд гарсан голомтууддаа тодорхойлж чадсан уу. Гаалийн ажилтны голомт тодорхой болсон уу?

-Гаалийн ажилтан төмөр замын тохиолдлоос халдвар авсан байх магадлалтай байна. Гаалийн ажилтны голомтыг бүгдийг нь шинжилж, голомтыг хумьж чадсан.

-"Ачтан-Элит клиник" эмнэлгээр үйлчлүүлсэн иргэд орон нутагт очсон гэсэн мэдээлэл байна. Энэ талаар тодорхой мэдээлэл өгөөч?

-Баярын өдрүүдэд халдварын голомт нэмэгдсэн. Оны дараа "Ачтан-Элит клиник" эмнэлгээр үйлчлүүлсэн хүмүүст анхааруулга өгсөн. Эмнэлэг нь өөрөө түргэвчилсэн оношлууртай учраас өвчтөнүүдээс халдвар илрээгүй байна. Гол нь сүүлийн өдрүүдэд тус эмнэлгээр үйлчлүүлсэн хүмүүсийг судалж үзсэн. Энэ үеэр эмнэлгээр үйлчлүүлсэн иргэд Өвөрхангай, Төв аймаг руу явсан тохиолдол гарсан. Тиймээс тэднийг шинжилж, урьдчилан сэргийлэх арга хэмжээ авсан. Гол нь тэдний шинжилгээний хариу сөрөг гарсан. 

-Нийслэлд тэг зогсолт хийнэ гэж байна. Эрүүл мэндийн яамнаас энэ талаар ямар байр суурьтай байгаа вэ?

-Тэг зогсолтыг Эрүүл мэндийн яам дангаараа шийддэггүй. Нийт 17 байгууллагын хүмүүс эрсдэлийн үнэлгээ хийдэг. Эдгээр байгууллагын саналыг үндэслэж, Эрүүл мэндийн яам Засгийн газарт саналаа хүргэдэг. Гол судалгааг ХӨСҮТ хариуцан хийдэг. Одоогоор тэг зогсолт хийх санал гараагүй байна.