Хууль зүйн байнгын хорооны хуралдаанаар Шүүхийн тухай хуулийн шинэчилсэн найруулгын төслийг хэлэлцэж байна. Хуулийн төсөлтэй холбоотой гишүүд асуулт асууж, хариулт авч байна.

УИХ-ын гишүүн Д.Ганбат: Шүүгч хараат бус байна гэж байгаа. Шүүх, шүүгчийн хараат бус байдалд нөлөөлсөн, шүүгч хараатаар асуудлаа шийдвэрлэсэн байвал яах вэ. Зөвхөн ажлаас нь чөлөөлж, сахилгын хариуцлага тооцоод өнгөрөх юм уу.

УИХ-ын гишүүн Б.Энхбаяр: Шүүгчийн хараат бус байдал, шүүх эрх мэдэлд халдаж байгаа шийдвэрийг Ерөнхийлөгч, УИХ, Засгийн газар гэсэн Үндсэн хуулийн дээд түвшинд ажиллаж байгаа байгууллага гаргаж байгаа гэсэн дүгнэлт хийсэн. Бие даасан институц гэдэг утгаараа энэ хүмүүсээс хамгаалах шаардлагатай. Ажлын хэсгээс төсөлд шинэ томьёолол оруулсан байгаа. Гол агуулга нь Ерөнхийлөгч, Засгийн газар, УИХ шүүхийн бие даасан, хараат бус байдалд халдсан бол Шүүхийн ерөнхий зөвлөл даруй хуралдаж, Үндсэн хуулийн Цэцэд хүсэлт хүргүүлнэ гэж заасан. Үндсэн хууль ёсоор Шүүхийн ерөнхий зөвлөл шүүгч, шүүхийн хараат бус байдлыг хамгаалах ёстой. Шүүх эрх мэдэлд халдаад байхад ШЕЗ хамгаалахгүй байсаар ирсэн. Тиймээс хэрэв ийм тохиолдол гарвал халдсан хүмүүсийг Үндсэн хуулийн Цэцэд хандаж, огцруулдаг болно.