Он гарахтай зэрэгцсэн ТОМИЛГОО, ШИЙДВЭРҮҮД хуудуутай юу

Б. Бадралмаа:
Улс төр

2021-01-05, 1329

-ШИНЭ ЖИЛИЙН БАЯРЫН ӨМНӨХ ӨДӨР ЦӨӨНГҮЙ ГАЗРЫН ДАРГА, АЛБАТЫГ ТОМИЛСОН НЬ ЯМАР УЧИРТАЙ ВЭ-

Аливаа баяр, наадмыг далимдуулж, халаа сэлгээ, томилгооны асуудлаа шийдэх гэж улайрдаг төрийн гаж тогтолцоо энэ Засгийн үед ч үргэлжилсээр л байгаа нь харамсалтай. Эрх баригчид иргэд анхаарлаа сулруулахыг андахгүй отож байгаад цагаан сар, Үндэсний баяр наадам, шинэ жилийн баяр дөхсөн, давхацсан үеэр аль будлиантай, эрх ашгийн зөрчилтэй асуудлаа шийддэг зальжин аргатай болоод удаж буй. Энэ удаад ч шинэ он солигдохтой бараг зэрэгцэн Монголын төр халаа сэлгээний цөөнгүй асуудлаа цэгцлэхийн хажуугаар хуудуутай шийдвэрүүдээ ч гаргаад амжлаа.

Тодруулбал, Үндэсний хөгжлийн газрын хуучин удирдлагуудыг чөлөөлж, дараагийн дарга нарыг томиллоо. Тус газрын даргаар Х.Батжаргалыг, дэд даргаар нь Б.Булганчимэг, эдийн засагч Б.Дөлгөөн нарыг томилсон байна.

Дараагийн анхаарал татсан томоохон томилгоо нь “Эрдэнэс Монгол” компанийн дэд захирлууд байв.

Өнгөрсөн аравдугаар сард тус компанийн гүйцэтгэх захирлаар УИХ-ын гишүүн асан Д.Хаянхярваа томилогдож, компанийн бүтцэд өөрчлөлт оруулахаар болсон юм. Ингээд зарим газрыг татан буулгаж, хэлтэс болгох ажлыг эхлүүлснээр нэг тэргүүн, гурван дэд захиралтай үйл ажиллагаагаа явуулахаар болсон юм. Тэргүүн дэд захирлаар Ж.Тана томилогдож байгаа гэх мэдээлэл бий. Харин Засгийн газраас гаргасан шийдвэрээр тус компанийн дэд даргаар УИХ-ын гишүүн асан Л.Энхболд, УИХ-ын Тамгын газрын дарга асан Ц.Цолмон, УИХ-ын гишүүн Д.Тогтохсүрэнгийн зөвлөх Л.Хосбаяр нарыг томилоод байгаа юм.

Эдгээрээс хамгийн эрх ашгийн зөрчилтэй хүнээр УИХ-ын гишүүн асан Л.Энхболд нэрлэгдээд байгаа юм. Учир нь, тэрбээр ЖДҮХС-аас эрх мэдэл, албан тушаалаа урвуулан зээл авсан гэх хэрэгт холбогдоод нэлээд хугацаа өнгөрөөж буй. Уг нь бол эрүүгийн хэрэг үүсгэж, шалгагдаж байгаа ч АТГ-аас уг албан тушаалд томилоход ашиг сонирхлын зөрчил үүсэхгүй гэх хоёр утгатай бичиг өгсөн байгаа юм. Ямартай ч түүнийг “Эрдэнэс Монгол” компанийн дэд захирлаар томилсон байна. Гэвч түүнтэй холбоотой элдэв баримт, хэл ам хэвлэлийн хуудаснаа хөвөрсөөр байна.

Засгийн газрын оны өмнөх дараагийн томилгоо нь Төрийн нарийн бичгийн дарга, хоёр агентлагийн даргыг жинхэлсэн явдал байв. Тодруулбал, Эрчим хүчний яамны Төрийн нарийн бичгийн даргаар Б.Насантогтохыг, Гадаадын иргэн, харьяатын газрын даргын даргаар Н.Ууганбаярыг, Мэргэжлийн хяналтын ерөнхий газрын даргаар Т.Гантулга нарыг томилж, жинхэлжээ. Тэднийг өнгөрсөн наймдугаар сараас дээрх тушаалд ажиллуулж эхэлсэн ч Цар тахлын тухай хуулиар түр томилгоо хийгээд байсан юм.

Хуучин эрх барьж байсан нам төрийн эрхийг “гартаа” авсан ч Сайд дарга нар нь солигдсон учраас ийн томилгооны асуудал дуусаагүй л байна. Гэвч шинэ жилийн бужигнаантай өдрүүдийг тааруулж, томилгоо хийж байгаа нь олон нийтийн хардлага, хуудуу, будлиан дагуулаад байгаа юм. Хэрэвзээ хуудуугүй “но”-гүй томилгоо байсан бол баярын өдрүүдтэй давхцуулах шаардлага байхгүй биз ээ. Уг нь бол Ерөнхий сайд “Цар тахлын үед халаа сэлгээний асуудал байхгүй шүү” гэж анхааруулж байсан. Гэвч түүний үг хүчгүй болсон уу, үгийг нь сонсох албатгүй болсон уу. Ямар ч байсан төрийн халаа сэлгээ улам бүр эрчимжиж, хаа сайгүй дарга, цэргийн томилгоо өрнөж байна.

ХАРМАГТАЙН ОРДЫГ ХАЛАМЖ БОЛГОХ УУ

Түүнчлэн Засгийн газрын 2020 оны арванхоёрдугаар сарын 31-ны хуралдаанаар яаран сандран гаргасан өөр нэг чухал шийдвэр нь Хармагтайн ордын 53.1 тонн алтыг улсын нөөцөд бүртгэсэн үйл явдал байв. Өмнөговь аймгийн Цогтцэций суманд “Хармагтайн” бүлэг ордын “Овоот хяр” хайгуулын тусгай зөвшөөрлийн талбайн “Хойд бүргэдэй” хүдрийн биетэд 53.1 тн алтны нөөц буй. Тус орд газарт хайгуулын ажлыг үргэлжлүүлэн хийж, алт болон бусад ашигт эрдсийг бүрэн гүйцэд тогтоох ажлыг улсын төсвийн хөрөнгөөр 2021 онд хийж гүйцэтгэх шийдвэр гаргаад байгаа нь анхаарал татаж байна.

Өнгөрсөн удаад төр байгалийн баялгийг иргэдэд тэгш хүртээх нэрээ “хөөсөрсөн”, халамжид дулдуйдсан шийдвэр олон гаргаж байсан.

Тухайлбал, Салхитын мөнгөний ордыг төр мэдэлдээ авч, орлогоор нь тэтгэвэр барьцаалсан зээлийг нэг удаа тэглэж байсан нь саяхан. Ер нь энэ мэтээр байгалийн баялгаа халамж болгон тарааж, үнэгүйдүүлэх арга замыг төр удирдаж буй дарга нар сонгосоор байна. Зүй нь бол байгалийн баялгаа ирээдүй хойчоо бодож, бүтээн байгуулалтад зарцуулах ёстой.

УИХ-ын дарга Ш.Занданшатар шинэ жилийн мэндчилгээндээ “Тэтгэврийн зээл аваагүй иргэдэд тавдугаар сар гэхэд нэг сая төгрөгийг бэлнээр олгоно” хэмээн мэдэгдсэн. Засгийн газраас нь Хармагтайн ордын алтыг улсын нөөцөд бүртгэгдсэн үйл явдалтай түүний дээрх мэдэгдэл давхардаж байгаа нь байгалийн баялгаа зүгээр тараах нь гэх хардлагыг түрүүлж байна. Хармагтайн ордны нөөц бонус, ваучир, өр зээлийг тэглэх хэн нэгний эрх мэдэлд хүрэх бамбай битгий болоосой.

Он гарахтай зэрэгцсэн ТОМИЛГОО, ШИЙДВЭРҮҮД хуудуутай юу

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.