-МАН-ЫН БҮЛЭГ ДОТРОО ХОЁР ХУВААГДАХАД Ж.МӨНХБАТ 32-ЫН БҮЛГИЙН ТЭРГҮҮН ЭГНЭЭНД ЖАГСАЖ, У.ХҮРЭЛСҮХИЙГ ЕРӨНХИЙ САЙДААС ОГЦРОХЫГ ШААРДАЖ БАЙСАН НЬ ЕРДӨӨ ХОЁРХОН ЖИЛИЙН ӨМНӨ БОЛСОН ҮЙЛ ЯВДАЛ-

УИХ-ын гишүүн Ж.Мөнхбат Ерөнхий сайд У.Хүрэлсүхэд тал засаж эхэлжээ. Яруу найрагч гэх тодотголтой тэрбээр М.Энхболдын ойрын хүн гэгдэж, У.Хүрэлсүхтэй ана мана үзэлцэж байсан цаг саяхан. Тэр ч бүү хэл У.Хүрэлсүхийг буруутган, намын гишүүд рүүгээ давшилж, нам дотроо “жүжиг” найруулж байсан нь ч цөөнгүй.

МАН-ын бүлэг дотроо хоёр хуваагдахад Ж.Мөнхбат 32-ын бүлгийн тэргүүн эгнээнд жагсаж, У.Хүрэлсүхийг Ерөнхий сайдаас огцрохыг шаардаж байсан нь ердөө хоёрхон жилийн өмнө болсон үйл явдал. Эргэн сануулахад, УИХ дахь МАН-ын бүлгийн хэсэг гишүүн У.Хүрэлсүхийн Засгийн газрын огцруулах саналыг 2018 оны арваннэгдүгээр сард УИХ-д өргөн барьж, хэлэлцүүлсэн.  Энэ үеэр УИХ-ын гишүүн Ж.Мөнхбат “Шившигтэй юм болж байна. Ерөнхий сайдыг огцруулах хамгийн гол үндэслэл бол ЖДҮ-гийн хулгай шүү дээ. Асуудалд холбогдсон сайд нараа Монголын ард түмэн та бүхнийг хүлээж байна. Албан тушаал түр хугацааных, ард түмний эрх ашиг мөнхийн юм. 2016 оны сонгуульд У.Хүрэлсүхийг Хэнтийд нэр дэвш гэхэд та татгалзаж, "гардан тулаан"-аас зугтаасан. 2020 онд нам ялагдвал өмнөх шигээ Австрали руу дахиад зугтаах уу. Өчигдөр намайг болон нэр бүхий гишүүдийг намаас хөөсөн байна лээ. Намаас хөөнө гэдгээс би айхгүй ээ. “Миний дүү эднийг шүүрдэх жагсаал зохион байгуулж өгөөч” гэж хүсэж байсан. Би хүмүүсийн зургийг шатааж, шүүрдэж байсан. Энэ хүмүүсээс уучлал гуйя. Энэ үйл явдлаас болж МАН хоёр хуваагдсан шүү” хэмээн намын даргынхаа өмнөөс хэнхэлзэж байв.  

Үүний хариуд У.Хүрэлсүх “1990 оноос хойш би энэ намд ажиллаж байгаа. Тэр үед миний дүү сураггүй байсан шүү. Би чамайг Солонгосоос олж авчирсан байх шүү, миний дүү. Би чиний талаар зөндөө зүйл мэднэ. Хүний тусыг битгий мартаж байгаарай. Намаас хөөх хүмүүсийг би шийдэхгүй, Хяналтын хороо шийднэ. Гэхдээ хасах хүмүүсийн жагсаалтыг би гаргана. Би төрдөө, намдаа их цэвэрлэгээ хийнэ. 2020 онд ялагдвал ялагдана л биз. Сонгуулиас айгаад байдаг би тийм жижигхэн хүн биш. Чи бол их баялаг түүхтэй хүн шүү. Би чамайг мэднэ, карьерт чинь нөлөөлнө гэж бодоод ард түмний өмнө дуугүй байгаа шүү" хэмээн бие, биенийхээ баялаг түүхийг хайр найргүй сөхөж явлаа.   

Түүнчлэн Ж.Мөнхбат “Цензургүй яриа” нэвтрүүлэгт оролцох үедээ “Албан тушаал үүрдийн биш. Үүнийг би Ерөнхий сайдад ч хэлсэн. Би Ерөнхий сайд У.Хүрэлсүхтэй зарчим таарахгүй байгаа юм. Намын дарга, удирдагч хүн эвлүүлдэг байтал эсрэгээрээ сэлэмдэнэ, сүхдэнэ гээл байвал хол явахгүй. Том булчингаар төрийг удирдахгүй, том ухаан, том ёс суртахуун, том эв нэгдлээр удирдана” гэж байсан ч удаатай. Өөрөөр хэлбэл, сонгогч түмэн төдийгүй улс төрийн хүрээнийхэн Ж.Мөнхбатыг У.Хүрэлсүхийн үзэл баримтлал, улс төрийн шийдвэрүүдэд эсрэг байр сууринаас ханддаг, түүнтэй нэг намд байж болох ч нэгдэж огт чадахгүй улстөрч хэмээн үг, үйлдлээс нь үнэлж, тодорхойлж ирсэн гэхэд хилсдэхгүй.

Гэвч тэр өнгөрсөн баасан гарагт өөрийгөө, өмнөх жилүүдэд ярьж ирсэн үнэт зүйлсээ, улс төрийн байр сууриа хаанаа гээчихэв гэмээр гэнэт У.Хүрэлсүхийнх болсон гэдгээ парламентын танхимаас зарлалаа. Тодруулбал, тэрбээр чуулганы хуралдаан дээр “Хэд хоногийн өмнө Ерөнхий сайдад ажил танилцуулахаар албан өрөөнд нь ортол “Эх оронч сэтгэлгээгээр эрчим хүчээ гамнана аа” гэчихсэн арын өрөөнийхөө нэмэлт халаагуурыг салгасан байсан. Нэлээд хүйтэн, жаахан суухад жиндэх маягтай өрөөнд Ерөнхий сайд маань ажиллаж байна билээ” гэж У.Хүрэлсүхэд илт тал зассан, улстөрчдийн ярьдгаар “Зарагдсанаа” илэрхийлсэн явдал болж өнгөрлөө.

Түүний энэхүү үйлдлийг учир мэдэх хүмүүс “У.Хүрэлсүхийн гарт Монголын улс төрийн хувь заяа одоохондоо байгаа. Ирэх хавраас энэ Засгийн газрыг огцруулах нэрээр дараагийн хүмүүсийг “хоолонд” нь оруулна. Тэдний дунд Ж.Мөнхбат багтаж, ЗГХЭГ-ын дарга биш юмаа гэхэд гайгүйхэн албан тушаалд томилуулчих гээд өрөөнөөс нь салахаа байсан гэсэн” гэж байв. Түүнчлэн “Шаардлага гарвал У.Хүрэлсүхийг М.Энхболдыг өмөөрч байсан шигээ өмөөрөхөөс ч буцахгүй” гэх яриа ч улстөрчдийн дундаас “нисэлдэж” байлаа.

“Мөнгөтэй хүнийг аав аа гэж дуудсан ч яадаг юм” гэгчээр улс төрийн нөлөө бүхий хэнбугайд ч хошуу дэвсэж, улыг нь долооход бэлэн байдаг зангараггүй, хүчгүй, эрх мэдэл, албан тушаал дагаж, “хийссэн” улстөрчид Монголын төрд жил ирэх тусам олширсоор байгааг онцлох хүн цөөнгүй байна.