С.Ламбаа: Олон улсын байгууллагаар дамжуулаад вакцинаа бүгдийг нь авчихна гэвэл үүн шиг худлаа юм байхгүй

Б. Бадралмаа:
Улс төр

2020-12-04, 808

Ерөнхийлөгч 2021 оны төсөвт хориг тавихдаа төсөвт ковидын эсрэг вакцийн худалдан авах хөрөнгийг тусгах хэрэгтэй хэмээн үзсэн. Энэ талаар УИХ-ын гишүүд байр сууриа илэрхийлж байна.

УИХ-ын гишүүн Ж.Сүхбаатар "Ерөнхийлөгчийн хоригийг арванхоёрдугаар сарын 4-нд хэлэлцэж байна. Төсвийн тухай хуулиар арванхоёрдугаар сарын 5-ны дотор аймаг, нийслэлийн төсвүүд батлагдах ёстой. Хоригийг хэлэлцэж байх энэ үед орон нутгийн төсвийг батлах ажиллагаа ид явагдаж байна. Үүний дараа сум, дүүргүүд арванхоёрдугаар сарын 20-ны дотор батлана. Төсвийн жил нэгдүгээр сарын 1-нээс эхэлнэ. Ерөнхийлөгч төсөвт бүхэлд нь хориг тавьсан нь илүү улс төрийн зорилготой нь ойлгогдож байна. Хоёрдугаарт, бид Венесуэлийн жишээг бодох ёстой. Мөнгөн дүнгээр нэг сая төгрөг өгөх тухай асуудал ярьж болох юм. Бодит дүнгээр өгч чадах уу үгүй юу. Иргэдэдээ тусалж, эдийн засгаа дэмжиж байна гээд улсаа алж болохгүй. Эдийн засгийн эрүүл мэнд маш нарийн зүйл. Сэтгэлийн хөдлөлөөр хандаж болохгүй.

Вакцин авах мөнгөний тухайд яагаад гадны байгууллагуудын мөнгөөр авах гээд байгаа юм бэ. Манай улс яаж ч ядарсан гээд вакцинаа авчих хэмжээнд байгаа. Энэ мөнгийг төсөвт суулгаагүй гэж яриад байна. Төсвийн эх үүсвэрийн орлого талд нь гадны зээл тусламж угаасаа байдаг зүйл. Гаднаас вакцин авахад зориулах зээл нь эдийн засгийн бус хүмүүнлэгийн зээл. Хүмүүнлэгийх учраас түргэн, шуурхай, хямд гэж ойлгоод байгаа. Үүн дээр нь ядмагхан улс төр хийж байгааг эсэргүүцэж байна. Төсөвт засан сайжруулах зүйл байгаа.

Төсвийн байнгын хорооны дарга Б.Жавхлан: Вакцин худалдаж авахын тулд Дэлхийн банк, ДЭМБ-ны төсөлд хамрагдаж байгаа. Товчхондоо үүнд хамрагдсанаар оочер дайрч байгаа гэж ойлгож болно. Бизнес талаасаа хоёр сая вакцин гэдэг үйлдвэрлэгч талаасаа бага хэмжээний худалдан авалт юм билээ. Магадгүй 180-аад орны төгсгөл рүү ч очих эрсдэлтэй. Дэлхийн банк болон ОУВС зэрэг дэлхийн улс гүрнүүдийн нэгдэл болсон эдгээр байгууллагуудтай сүүлийн жилүүдэд хамтарч ажилласны үр дүнд үүссэн харилцаагаа ашиглаж харилцаанд нэгдэж орсноороо Монгол Улс вакцины худалдан авалтын тэргүүн эгнээний цөөхөн улсуудын жагсаалтад орох боломжтой болсон.

Хамгийн том давуу тал нь тэр зээлд хамрагдсанаар нийт вакцины 20 хувийг үнэгүй авч байгаа. 80 хувийнх нь төлбөрийг хийнэ. Хамгийн үнэтэйдээ найман ам.доллараар авлаа гэж бодъё. Гурван сая хүнд 24 сая ам.доллар шаардлагатай. Зээлээр авах 50 сая ам.доллараас гадна төсөвт тусгасан 20 саяын нөөц байгаа. Ингэхээр бүх иргэдээ вакцинд хамруулах боломжтой байна. Вакцины зардал 2021 оны төсөвт бүрэн тусгагдсан.

Ерөнхийлөгчийн зөвлөх С.Ламбаа: Олон улсын байгууллагаар дамжуулж вакцийн авдаг зүйлийг Монголчууд дархлаажуулалтынхаа хуулиар хийчихсэн. Гэхдээ энэ чинь хүүхдийн дархлалын вакцийнд хамааралтайгаас биш бусдад нь ямар ч хамаагүй. Олон улсын байгууллагаар дамжуулаад вакцинаа бүгдийг нь авчихна гэвэл үүн шиг худлаа юм байхгүй. ДЭМБ 192 орондоо бүгдэд нь хүргэхийг бодож байгаа. Их удахдаа л 10-20 хувийг нь өгнө. Бид энэ зовлонг нь мэддэг улс. Вакцины хөрөнгийг төсвөөсөө гаргадаг шүү дээ. ЭМЯ-ны судалгаагаар нэгж тунг 2-5 ам.доллараар тооцсон байна лээ. Үнэн хэрэгтэй тэр вакцин чин 25-30 ам.доллараар худалдаалагдаж байгаа. Хоёр тунгаар тооцохоор 300-400 орчим сая төгрөг бодитоор гарна. Тээвэрлэлтийн зардал нь ч өндөр. Би энэ зовлонг нь үзсэн хүний хувьд хэлж байна.

С.Ламбаа: Олон улсын байгууллагаар дамжуулаад вакцинаа бүгдийг нь авчихна гэвэл үүн шиг худлаа юм байхгүй

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.