УИХ-ын чуулганы хуралдаан Засгийн газраас өргөн мэдүүлсэн Гаалийн албан татвараас чөлөөлөх тухай хуулийн төслийг хэлэлцэх асуудлаар үргэлжилж байна. Хуулийн төсөлтэй холбоотой гишүүд асуулт асууж, хариулт авч байна.

УИХ-ЫН ГИШҮҮН Б.ЖАВХЛАН: Зөвхөн хуульд заасан бүтээгдэхүүнүүдийг оруулж ирж байгаа импортлогч нар дээр ийм хөнгөлөлт явна. Дотоодын борлуулалтын НӨАТ-ыг яах юм бэ. Мөн  ийм хэмжээний хөнгөлөлт үзүүлснээр эцсийн хэрэглэгч дээр жагсаалтад орсон бараа бүтээгдэхүүний үнэ хэдэн хувиар хямдарч очих вэ.

САНГИЙН САЙД Ч.ХҮРЭЛБААТАР: Импортлогчдыг зөвхөн татвараас чөлөөлөөгүй. Монгол Улсын нутаг дэвсгэр дээр боловсруулсан ургамлын тос, дотооддоо үйлдвэрлэсэн бүх төрлийн малын тэжээл, бүх төрлийн хүнсний будааг НӨАТ-аас тус тус чөлөөлнө. Вакциныг ч гэсэн НӨАТ-аас чөлөөлөх хуулийн зохицуулалт байгаа. Нийтдээ төсвийн орлого 39 тэрбум төгрөгөөр буурна. Яагаад гэвэл 2021 оны төсвийг хэлэлцэж байх үед  халдвар дотоодод гараагүй байсан. Тийм учраас хамт өргөн мэдүүлээгүй. Бараа бүтээгдэхүүний үнэ эрэлтээс хамаарах учраас эцсийн хэрэглэгчид тэдэн төгрөгөөр очно гэж хэлэх боломжгүй. Үнэ өсгөхгүй байх боломжийг л энэ хуулиар олгож байгаа гэж ойлгож болно.