Улсын онцгой комисс хуралдсаны дараа Засгийн газар хуралдаж дараах шийдвэрийг гаргасан байна. Шадар сайд Я. Содбаатар “Маргааш өглөөний буюу арваннэгдүгээр сарын 12-ны 06:00 цагаас арваннэгдүгээр сарын 17-ны 06:00 цаг хүртэл Гамшгаас хамгаалах бүх нийтийн  бэлэн байдлын зэрэгт шилжүүлэх шийдвэрийг Засгийн газрын хуралдаанаас гаргалаа. Маргааш өглөөнөөс таван өдрийн хугацаатай хатуу хөл хорионы дэглэм рүү шилжүүлж байна" гэлээ. Бүх нийтийн бэлэн байдлын зэрэг манайд анх удаа авагдаж байгаа арга хэмжээ юм байна. Энэ хүрээнд дараах байгууллагууд хэвийн ажиллана. Тухайлбал, хүнсний дэлгүүр, супермаркет, хүнсний зах, шатахуун түгээгүүр, эмийн сан, эмнэлэг, худаг усан хангамж, дулаан хангамж, цахилгаан станц, хэвлэл мэдээлэл, харилцаа холбоо, буяны үйл ажиллагааны байгууллагууд ажиллах юм. Хот хоорондын хүнсний тээвэрт хязгаарлалт хийхгүй гэлээ. Тиймээс ард иргэдийг гэрээсээ гарахгүй байхыг анхаарууллаа. Мэргэжлийн байгууллагууд хөдөлгөөнийг эрс хязгаарлахыг зөвлөж байгаа. Төрийн байгууллагуудын хувьд ковидтой холбоотой цөөн тооны хүмүүс ажиллана. Бүх салбарт гамшгаас хамгаалах улсын алба байдаг. Тухайн албанд хэн ажиллах нэрс өнөөдөр гарч байгаа. Тэр хүмүүс ажиллаж бусад нь гэртээ байна. Үүнтэй адил хувийн хэвшлийн байгууллагууд ажилчдаа гэрээсээ ажиллах боломжоор хангаач ээ гэж уриалж байна" гэлээ.