АНУ-ын Техас мужийн Сан-Антонио хотын захад хаягдсан ачааны автомашинаас 42 цагаачийн цогцос олдсон талаар бид өмнө нь мэдээлсэн. Тэгвэл хэргийн газарт яаралтай тусламжийн байгууллага ажиллаж, шалгалт хийснээр автомашинаас олдсон цогцсыг тоо нэмэгдэж, 46 болжээ. Хамгийн сүүлийн мэдээллээр автомашинд амьд үлдсэн 16 хүнийг эмнэлэгт хүргэсэн. Биеийн байдал муу эмнэлэгт хүргэгдсэн 16 хүний дөрөв нь бага насны хүүхэд аж.

Сан-Антонио хот нь АНУ-Мексикийн хилээс 250 км зайд оршдог тул цагаачид хууль бусаар хил нэвтрэх тохиолдол олон байдаг. Урьдчилсан байдлаар дээрх хэргийг хүний наймаачид бичиг баримтгүй цагаачдыг АНУ руу нэвтрүүлснийхээ дараа алдлагдсан нутагт аваачиж, худалдаалж байсан байж болзошгүй гэж үзэж байгаа юм. Хэргийн талаар Сан-Антонио хотын захирагч Рон Ниренберг "Тэд ч гэр бүлтэй байсан. Илүү сайхан амьдралыг хайж энд ирсэн байх. Энэ бол хүний наймааны хэргийн цаадах аймшигт эмгэнэл юм" гэжээ.

                                     Сан-Антонио хотын захад хаягдсан ачааны автомашинд хамгийн эхэнд ажилласан тус хотын Гал түймрийн албаны дарга Чарльз Худ "Манай албаныхны хэн ч, ийм зүйл болно гэж төсөөлж ирээгүй байх. Гаднаасаа түгжигдсэн ачааны автомашиныг онгойлгоход дотор нь дүүрэн цогцос байсан. Агааржуулагч нь ч ажиллахгүйн дээр дусал ч ундны ус байхгүй байсан" гэж мэдээлсэн байна. Харин Мексик Улсын Гадаад хэргийн сайд Марсело Эбрард "Эмнэлэгт хүргэгдсэн хүмүүсийн дунд Гвател Улсын хоёр иргэн байгаа. Бусад хохирогчийг аль улсын иргэн байсныг тогтоогоогүй байна" гэжээ.