АНУ-ын Техас мужийн Сан-Антонио хотын захад хаягдсан ачааны автомашинаас 42 цагаачийн цогцос олджээ. Техас мужийн Сан-Антонио хот нь АНУ-Мексикийн хилээс 250 км зайд оршдог тул цагаачид хууль бусаар хил нэвтрэх тохиолдол олон байдаг. Орон нутгийн хэвлэлийн мэдээлснээр ачааны автомашинд амьд байсан 10 гаруй хүн маш хүнд биеийн байдалтай эмнэлэг рүү хүргэгджээ.

                       "Нью-Йорк Таймс" сонинд Сан Антонио хотын цагдаагийн газрын ажилтнууд мөн хэргийн газраас сураггүй болсон тээврийн хэрэгслийн жолоочдыг хайж байгаа талаар мэдээлжээ. Хүмүүс хэрхэн нас барсан нь одоогоор тодорхойгүй байгаа бөгөөд орон нутгийн цагдаа нар олон нийтэд тайлбар хийгээгүй байна. Техасын Бүгд найрамдах намын Амбан захирагч Грег Эбботт АНУ-ын Ерөнхийлөгч Жо Байденыг энэ хүмүүсийн үхэлд буруутгаж, "Энэ бол түүний үхлийн аюултай хилийн бодлогын үр дүн" гэжээ.

Цагаачлал нь АНУ-ын улстөрийн хамгийн маргаантай асуудлуудын нэг. Өнгөрсөн жил гэхэд Мексикээс улсын хилээр нэвтэрсэн маш олон бичиг баримтгүй цагаачдыг баривчлан саатуулж, буцааж байсан юм.