Олон Улсын таеквондо,”ITF”-ийн дэлхийн аварга, ОУХМ Сандагдоржийн Будхүү багш, Монгол Улсын гавьяат дасгалжуулагч цол хүртжээ. Тэрбээр Завхан аймгийн Цагдаагийн газрын ахмад цолтой ажилтан. Завхан аймагт Олон улсын таеквондо-гийн спортыг амжилттай хөгжүүлж, дэлгэрүүлэн яваа нэгэн.  

     С.Будхүү багш ДАШТ-ээс хоёр алт, таван мөнгө, хоёр хүрэл медаль хүртэж, дэлхийн цомын гурван удаагийн аварга болж байсан. Мөн Ази тивийн аваргын мөнгө, хүрэл медальттай.  Олон улсын “А” зэрэглэлийн тэмцээнээс долоон медаль хүртэж байв. Монгол Улсын 17 удаагийн аварга тамирчин юм.

    Завхан аймагт “Цэцэн шонхор” клубийг үүсгэн байгуулж баруун бүсийн хүүхэд, залуучуудыг тулааны спортоор хичээллүүлэх, спортын хөгжлийг түгээн дэлгэрүүлэх үйлсэд үнэтэй хувь нэмэр оруулж буй шилдэг дасгалжуулагч билээ. Түүний анхны шавь Ө.Ядамсүрэн багшийн шавь, Хөдөлмөрийн баатар, МУГТ У.Сүрэнжав “Парис-2024” паралимпын аварга болж байсан билээ. Энэ бүхэнд МУГД С.Будхүү багшийн оруулсан хувь нэмэр багагүй байгаа.