“San juniper” хамтлагийн гоцлол хийлч Bay буюу Б.Баярцэнгэлийн төрсөн өдөр маргааш тохиох гэж байна. Дуучин, хөгжимчин залуу төрсөн өдрөөрөө залуу хөгжимчдийг дэмжихээр хандивын тоглолт хийхээр шийджээ. Тус тоглолтын зорилго нь авьяаслаг хэдий ч санхүүгийн байдлаас болоод тэмцээн, уралдаан оролцож чадахгүй байгаа авьяаслаг хөгжимчдийг дэмжих юм. Ингээд хөгжимчин Б.Баярцэнгэлтэй холбогдож тоглолтынх нь талаар тодрууллаа.

-Төрсөн өдөртөө зориулан хийж байгаа арга хэмжээний хэмжээнийхээ талаар ярихгүй юу?

                -Удаан хугацаанд бодож явсан ажлаа бодит болгож байна. Бид дараагийнхаа үе ямар нэгэн сайхан зүйлийг үлдээх ёстой гэж бодсон. Удаан бодсон эцэст миний хийж чадах зүйл нь тоглолт гэдгийг ойлгосон. Тоглолтынхоо орлогоор дараагийнхаа үеийн залуу хөгжимчдийг дэмжиж, гэрэлтэй хаалгыг нээхээр шийдсэн. Энэ орчлонд ирсэн өдрөө бусад боломж олгохын төлөө тоглолт хийх нь надад илүү сайхан санагдсан.

-Цугларсан хандивын мөнгөөр юу хийх гэж байгаа вэ?

                -Багадаа тэмцээнд оролцох боломжтой ч явж чаддаггүй хүүхэд байсан юм. Унаа болон байрлах зардлын төлбөр, виз гээд мөнгөний хэрэг их гардаг байлаа. Мөнгө нь байхгүй учраас оролцож чадахгүй байгаагаа мэдэхгүй өөрийгөө муу хөгжимчин гэж боддог байсан. Хүүхэд байх үетэй минь адилхан мөнгөний асуудлаас болж тэмцээнд оролцож чадахгүй байгаа ч чадварлаг хөгжимчид олон бий. Тэдэнд тусалж, бага ч гэсэн дэм болохыг хүссэн. Тоглолтын үеэр цугларсан мөнгийг бүгдийг задуу хөгжимчдөд зориулна.

-Тоглолтод ямар, ямар уран бүтээлчид оролцох бол?

                -Тоглолтод маань жазз Дуучин Жожо, Маралжингоо болон Sanjuniper хамтлаг бүрэн бүрэлдэхүүнээрээ оролцоно.

-Ирээдүйд дахин хандивын хөтөлбөр зохион байгуулах уу?

                -Энэ удаагийн тоглолт хамгийн эхний алхам. Цаашид сангийн журмаар үйл ажиллагаагаа явуулна гэж бодож байгаа. “Bay's Foundation for Young Talent” залуу авьяаслаг хүүхдүүдийн авьяасыг ивээн тэтгэж, тэдэнд хамгийн гэрэлтэй хаалгыг нээж өгөх зорилготой.