Монголын орчин үеийн уран зохиолыг үндэслэгчдийн нэг Д.Нацагдорж, С.Буяннэмэх нарын 17 сэхээтэн цуглан хуралдаж, 1929 оны есдүгээр сарын 9-нд Хувьсгалч зохиолч нарын бүлгэмийг байгуулж, удирдагч нараа сонгон баталснаар тус өдрийг Монголын зохиолчдын өдөр болгон тэмдэглэх болсон байдаг. Тэгвэл тэр цаг мөчөөс хойш 95 жил өнгөрч, өдгөө үе үеийн зохиолчид ойн баяраа тэмдэглэж байна. Монголын Зохиолчдын эвлэлийн гал голомтыг өнөөдөр сахин хамгаалж, бичгийн их мэргэдийнхээ зохиол, бүтээлийг түгээн дэлгэрүүлж, үргэлжид сануулагч хэн бүхэн энэ айлаар овоглож яваа билээ. Тэд ийн баярлахдаа мэдээж их зохиолч Д.Нацагдорж, С.Буяннэмэх, Ц.Дамдинсүрэн, Ш.Лувсанвандан, Л.Түдэв, Ш.Удвал, Д.Маам зэрэг агуу зохиолчдоо, тэдний түүхийн шаргал хуудаснаа улам үнэ цэнжиж, гэрэлтэн гийх бүтээл туурвилыг ярьж, бахдан буй биз ээ. 

          Монголын Зохиолчдын Эвлэлийг 1929 оноос Мөрдэндэвийн Ядамсүрэн, 1934-1935 онд Сономбалжирын Буяннэмэх, 1936-1937 онд Т.Сэнгэдорж, 1938-1942 онуудад Т.Дэнчингунгаа, 1943, 1954 онд Цэндийн Дамдинсүрэн, 1947-1948 онд Шадавын Лувсанвандан, 1948-1952 онд Шагдаржавын Нацагдорж, 1953 онд Лувсандоржийн Тойв, 1955 онд Баярын Жаргалсайхан, 1956-1959 онд Дашзэвэгийн Сэнгээ, 1961-1974 онуудад Сономын Удвал, 1974-1975 онд Лодонгийн Түдэв, 1977-1990 онд Дожоогийн Цэдэв, 1990-1992 онд Дүгэржавын Маам, 1992-1993 онд Бавуугийн Лхагвасүрэн, 1993-1997 онд Долгорын Нямаа, 1997-2001 онд П.Баярсайхан /Д.Төрбат/, 2001-2008 онд Ц.Энхбат, 2009-2012 онд Х.Чилаажав, 2012-2015 онд Ц.Буянзаяа, 2017 онд А.Эрдэнэ-Очир, 2018 оноос Долгорын Цэнджав нар удирдаж иржээ.

              Монголын зохиолчид анхлан эвлэлээ байгуулсан ондоо багтааж, 15 хүний 36 зохиолыг оруулж, “Уран үгсийн чуулган” цомирлогийг хэвлүүлж гаргасан байдаг. Бичгийн мэргэлийн өлгий, уурхай болсон энэ том айл овоо ч цаг хугацааг туулан замнаж, туурвин бүтээж, үгийн увдист хөтлөгдсөн хэн бүхний итгэл, сэтгэл, хүсэл мөрөөдлийг өрдөн бадрааж, асаан ноцоогч юм. Ингээд үе үеийн их зохиолч, бичгийн мэргэд, туурвин бүтээгчдэд түүхт 95 жилийн ойн баярын мэндийг дэвшүүлье. Билиг оюун нь гэгээн тунгалаг байх болтугай.