Д.МӨНХ-ЭРДЭНЭ: ШОРОНД ХОР ӨГӨӨД АЛЧИХГҮЙ БОЛ ГАРЧ ИРЭЭД АЛАЛЦАНА

 АН-ын гишүүн, БНХАУ-ын Хөх хотын Ерөнхий консул асан Д.Мөнх-эрдэнэ шүүхээс 7-30 хоногийн баривчлагааны ял авчээ. Түүнийг Зөрчлийн хэргээр төрийн ажилд саад учруулсан гэх шалтгаанаар Гадаад харилцааны Төрийн нарийн бичгийн дарга Н.Анхбаяр гомдол гаргасан байна.  Тэрбээр “Шоронд надад хор өгөөд алчихдаггүй юм бол ЗГХЭГ дарга сайд Ц.Нямдорж, Хууль зүйн сайд Х.Нямбаатар та нартай  үзэлцэнэ" хэмээн өчигдөр цахим сүлжээнд дуулиан шуугиан тарьсан.

     Д.Мөнх-Эрдэнэ “Зууны хулгайч нарыг илрүүлнэ” хэмээн лайв хийж эхэлсэн цагаасаа хойш олон хүнийг үг хэлээр доромжилж, Төрийн яам, нийслэлийн захиргаа руу дураараа нэмтэрч, хууль хяналтынхан шиг дайрч ороод шалгалт хийх гэж оролдоод бардаггүй.  Яам бүрийн харуул хамгаалалтын ажилтнуудтай үзэлцдэг бүр танил болоод удаж байна. Магадгүй түүнийг лайв хийж хэн нэгэн сайд дарга нарын өрөө рүү өнгийх гэж явахад нь өөрийнх нь булхай улам бүр ил болж байгаа ч юм шиг. Тухайлбал, томчуудад хүүхэн зардаг байж болзошгүй бичлэг нь олон нийтэд ил болж, түүнийгээ өөрөө хүлээн зөвшөөрөөд дууссан гэхэд болно. Мөн Хөх хотод консул байхдаа албаны дөрвөн автомашинаа хууль бусаар борлуулсан гэх мэт түүний нэр холбогдсон хэргүүд ч ил болсоор байгаа.

Д.МӨНХ-ЭРДЭНЭ АЛБАНЫ АВТОМАШИНАА ХУУЛЬ БУСААР ЗАРСАН ГЭХ ХЭРГЭЭР АТГ-Т ШАЛГУУЛЖ БАЙГАА ГЭХ

2016 онд Засгийн газрын тогтоолоор Хөх хотын Ерөнхий консулаар томилогдсон тэрбээр албан үүргээ гүйцэтгэж байх хугацаандаа эрх мэдэл, албан тушаалаа урвуулан ашиглаж өндөр үнэтэй автомашин БНХАУ-д татваргүйгээр удаа дараа нэвтрүүлсэн хэрэгт холбогдсон юм. Тодруулбал, тэрбээр тансаг зэрэглэлийн дөрвөн автомашиныг тус улсад хууль бусаар нэвтрүүлсэн байдаг. Энэ тухай БНХАУ-ын Гадаад хэргийн яам, Монгол Улсаас БНХАУ-д суугаа Элчин сайдын яаманд илгээсэн албан бичигт “Монголоос ӨМӨЗО-ны Хөх хотод суугаа Ерөнхий консул Д.Мөнх-Эрдэнийн нэр дээрх дөрвөн автомашиныг БНХАУ-ын иргэд худалдан авч, урт хугацаагаар ашиглаж байсан бөгөөд Д.Мөнх-Эрдэнэ дундаас нь ашиг авч байсан нь тогтоогдож, АТГ-т шалгагдаж байгаа аж.

Б.ЖАРГАЛСАЙХАНТАЙ ЗОДОЛДОЖ “ОД” БОЛОВ

         “Өөрөөр нь төлүүлье” хэлэлцүүлгийн үеэр Б.Жаргалсайхантай нүүр тулсан даруйдаа зодолдож, сөргөлдөж эхлэв. Учир нь Б.Жаргалсайхан түүнийг ам нээх бүрдээ хүн доромжилдог чи хэн бэ, чамаас айхгүй шүү хэмээн гар утсыг нь унагаасан бичлэгийг олон нийтэд үзэж, хэсэг талцал бий болгосон билээ. Тэрбээр Б.Жаргалсайхан надад ясаа хэмхлүүлэхээс айгаад орчихлоо хэмээн лайваа үргэлжлүүлж, удалгүй олон танил жүжигчид Б.Жаргалсайханд Д.Мөнх-Эрдэнийг хэрхэн цохих байсан тухай зөвлөгөө өгч, бичлэг хийж байсныг та бүхэн санаж байгаа биз. Д.Мөнх-Эрдэнэ амныхаа зоргоор ярьж, лайв хийж байгаа нь сайн мөр дагуулж байгаа болов уу.

Д.МӨНХ-ЭРДЭНЭ ХҮҮХЭН ЗУУЧИЛДАГ НЬ БАТАЛГААТАЙ БОЛЖ, ӨӨРӨӨ ХҮЛЭЭН ЗӨВШӨӨРӨВ

        Түүнийг лайв хийж, сайд, дарга нарын хаалга татаж явахад нь өөрийнх нь хүүхэн зардаг тухай бичлэг олон нийтэд ил болж байсан. Тэрбээр тус бичлэгийн талаар тайлбар мэдээлэл хийхдээ “Энэ бичлэг ноцтой юм биш Гэхдээ үнэн. 2014 оны бичлэг байсан шүү. Тухайн үед намайг хэн ч танидаггүй байсан болохоор тоогоогүй. Би 32, 33 хүртлээ архи ууж, шоуддаг байсан. Намайг согтуу байх үед хамт явж байсан хүмүүс бичлэг хийчихсэн байсан. Бид хоорондоо мөнгөний талаар ярьж байсан юм билээ. Тэгээд бил мөнгийг нь АТМ-ээс аваад өгье гэж байсан юм билээ. Гэтэл 2016 онд намайг Хөх хотод Ерөнхий консул байхад “Таны согтуурсан үедээ ярьсан” бичлэг байна гээд надаас 10 сая төгрөг нэхэж байсан. Тухайн үед нь би эхнэртээ хэлж ойлгуулаад, 10 сая төгрөгийг нь өгч байсан.

Д.МӨНХ-ЭРДЭНИЙН ЭРХЭЛСЭН АЖИЛ     

• Баянхонгор аймгийн харъяат, 1980 онд төрсөн. 1998 онд ШУТИС-КтМС-ийн менежментийн ангид орж, 2002 онд төгссөн.
• БНСУ-д ажиллаж байх хугацаандаа Жийп сервис компаниа байгуулжээ.
• Баянхонгор аймгийн "Хонгорын хурд" ТББ-ын тэргүүн, Хөгжлийн төлөө сангийн тэргүүн асан.
• УИХ-аас санал болгож, Засгийн газраас 2016 онд Хөх хот дахь Ерөнхий консулаар ажилласан.
  Ажилласан хугацаа: Гурван жил
• Ерөнхийлөгч асан Х.Баттулгын 2018 болон 2012 оны сонгуулийн кампанит ажилд "Жийп сервис" компанийнхаа захирлын хувиар оролцсон юм.
• 2018 онд татваргүйгээр автомашин хил давуулж, наймаа хийсэн гэх шуугианд өртсөн. Тэрээр энэ талаараа: "Ерөнхий консулын албан тушаал хашихад хувийн болон албаны хэрэгцээнд ашиглах НЭГ л машин хилээр давуулдаг. Би өөрийн ашиглах машин болон ажилчдынхаа машиныг оруулсан. Үүнийг хэрэг гэж үзээд байна" хэмээн хэлсэн.
• Үндэсний аудитын хорооноос түүнийг байрны түрээс, хүүхдийн сургалтын төлбөр, гэрээт орчуулагч хөлсөлсөн, дипломатчдыг галт тэргээр биш онгоцоор монгол руу буцаасан гэх шалтгаанаар зөрчил илрүүлж, түүнийг буцаан татжээ.
• 2020 оны сонгуульд УИХ-ын гуравдугаар тойрог буюу Баянхонгор аймагт бие даан нэр дэвшсэн ч сонгогдоогүй.
• Тэрээр шууд дамжуулалт хийхдээ Ерөнхий сайд Л.Оюун-Эрдэнэ, Сайд Х.Нямбаатар, Засгийн газрын хэрэг эрхлэх газрын дарга Ц.Нямдорж нарын нэрийг байнга дурдаж, тэднийг шүүмжилдэг. Мөн АН-ын дарга С.Эрдэнийг "60 тэрбумын схемийг зурсан, гишүүдийг мөнгөөр уралдуулдаг" хэмээн шүүмжилж, хэвлэлийн хурал зарлаж байсан.
• Түүний эхнэрийн үеэл нь Гадаад харилцааны сайд Б.Батцэцэг.
• АН-ын гишүүн. УИХ дахь АН-ын бүлгийн зөвлөхөөр 2021 оны аравдугаар сарын 19-нд томилогдсон.