Монголын үндэсний бөхийн холбооны “Алтан цом” -ын зургаадугаар тойргийн сүүлийн хагас барилдаанд  “АПУ”, “Скайтел” ХХК-ийн “АПУ, Скайтел” баг Нутгийн буян группийн “Хубилай хаан” багтай учраа таарилдсанаас “АПУ - Скайтел” баг 18:7 -гоор дөрөв дэх ялалтаа авлаа.

    “АПУ - Скайтел” багт улсын арслан Б.Орхонбаяр /5/, улсын харцага Б.Цэдэнсодном /3/, тавдугаар тойргоос сэлгээнд сууж, түүний оронд орж барилдсан аймгийн арслан Т.Төгсдөлгөөн /0/ нэгч даваа аваагүй байна. Улсын өсөх идэр начин Ч.Батчулуун /2/, дөрөвдүгээр тойргоос сэлгээнд сууж, түүний оронд орж барилдсан аймгийн хурц арслан Б.Очирхүү /1/, аймгийн хурц арслан Н.Амгаланбаатар /3/, аймгийн арслан Э.Баасанжав /4/, нийт 18 даваа авсан.

   “Хубилай хаан” багт улсын начин Б.Даваа-Очир /0/ дөрөвдүгээр тойргоос сэлгээнд сууж, түүний оронд орж барилдсан улсын начин Х.Оргилболд /1/, улсын начин Б.Лхагвадорж /0/, улсын начин Б.Түвшинтөгс /2/, аймгийн арслан М.Эрхэмбаяр /2/ аймгийн арслан М.Гантулга /2/ нийт долоон даваа авсан юм. “АПУ – Скайтел” багийн дасгалжуулагчаар МУГД, улсын харцага Т.Өсөх-Ирээдүй, “Хубилай хаан” багийн дасгалжуулагчаар улсын өсөх идэр начин Н.Бүрэнбаатар, улсын начин Т.Довчинсэмбээ нар ажиллав.

    “ОД” группийн “Од групп” баг “ХЭРЭЙД” ХХК-ийн “Хүлэгү” багтай учраа таарилдсанаас “Од групп” баг 25:0 -оор илт давуу буюу хамгийн олон даваагаар дөрөв дэх ялалтаа авлаа. “Од групп” багт улсын заан Д.Хүдэрбулга /5/, улсын харцага Г.Ганхуяг /5/, улсын өсөх идэр начин Б.Түмэндэмбэрэл /5/, аймгийн арслан Х.Наранбаяр /5/, аймгийн арслан Д.Батбаяр /5/, нийт 25 даваа авсан.

   Харин “Хүлэгү” багт улсын заан Б.Серик /0/, аймгийн арслан Е.Көптилек /0/, аймгийн арслан Н.Намнансүрэн /0/, цэргийн арслан Б.Өлзийсайхан /0/ бүрэлдэхүүн дутуу барилдсан тус баг даваа авч чадсангүй. “Од” группийн дасгалжуулагчаар улсын заан Ц.Мягмарсүрэн, “Хүлэгү” багийн дасгалжуулагчаар улсын заан Б.Серик нар ажиллав. Өнөөдөр буюу гуравдугаар сарын 29-ний ням гарагт 14.30 цагаас долоодугаар тойргийн эхний хэсэгт: “Хатант интернэшнл” баг,  “Эв Монгол” багтай, “Хубилай хаан” баг – “MCS ENERGY” багтай тус тус барилдана.