ДЭМБ-ын ерөнхий захирал Тедрос Аданои Гебрейесус өнгөрсөн даваа гарагийн хэвлэлийн хурлын үеэрээ “Сүүлийн 20 гаруй хоногийн турш коронавирусийн халдварын шинэ тохиолдлын тоо эрс буурч байна” хэмээн мэдээллээ. Мөн тэрбээр “Хэдий аймшигт цар тахал дахин хувьсан өөрчлөгдөж байгаа хэдий ч цаашид дэлхийг хамарсан энэ том аюулыг хянаж болох найдвар харагдаж байна. Хүн бүр халдвар хамгааллын дэглэмээ сайн барьж чадвал цар тахлыг зогсоож чадахыг бид харж авлаа. Гэвч тайвшрах цаг арай л болоогүй байна. Цаашид илүү хичээж, эрүүл мэндийн салбар дахь мэдээллийн системийг шинэчлэхгүй бол дэлхийн хэмжээнд коронавирусийн улмаас нас барж буй 10 хүн тутмын нь дөрөв нь бүртгэгдэхгүй өнгөрч байна” гэв.

      Дэлхийн хэмжээнд сүүлийн 24 цагт 444 мянга гаруй халдвартай хүн бүртгэгдсэн байна. Улмаар дэлхийд нийт 103 сая гаруй хүн коронавирусийн халдвар авсан бөгөөд 2.4 сая гаруй нас баралт бүртгэгджээ.