Тээврийн цагдаагийн албанд энэ сарын 15-19-ны өдрүүдэд нийт 712 дуудлага мэдээлэл бүртгэгджээ. Үүнээс 502 нь зам тээврийн ослын шинжтэй бөгөөд ослын улмаас найман хүн гэмтэж, орон нутагт нэг иргэн амиа алджээ.

Тодруулбал, гуравдугаар сарын 15-ны 13:00 цагийн орчимд Архангай аймаг Эрдэнэбулган сумын III баг, Хөгжим драмын хойна асфальтан замд Howo маркийн автомашины чиргүүл салж, явган зорчигч 13 настай эмэгтэй хүүхэд мөргүүлж амиа алдсан байна.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон нийт 310 зөрчил илрүүлсний 112 нийслэлд, 198 орон нутагт тус тус бүртгэгдэж хуулийн дагуу хариуцлага тооцсон байна. 

 Монгол улсын Замын хөдөлгөөний дүрмийн жолоочийн үүрэгт эвдрэл, гэмтэл, техникийн зөрчилгүй байхаар тээврийн хэрэгслийнхээ бүрэн бүтэн байдлыг хангаж хөдөлгөөнд оролцохоор заасан байдаг. Мөн явган зорчигч нь явган хүний гарц буюу гармаар зам хөндлөн гарна. Хэрэв үзэгдэх хүрээнд явган хүний гарц, гарам байхгүй бол замын дагуу хоёр тийш сайн харагдах, хайс, хашилтгүй хэсгээр, ойртон ирж яваа тээврийн хэрэгслийг өнгөрүүлэн эгц хөндлөн гарна гэж заасан байдаг тул та бүхэн замын хөдөлгөөний дүрмээ баримтлан хөдөлгөөнд оролцохыг цагдаагийн байгууллагаас анхааруулж байна.