МҮХАҮТ, Бүгд Найрамдах Индонез Улсын Бээжин дэх ЭСЯ-тай хамтран “Худалдаа, хөрөнгө оруулалтын хэтийн төлөв” сэдэвт “Индонез–Монголын бизнес форум”-ыг Шангри-Ла зочид буудлын хурлын танхимд зохион байгуулагдлаа.

Форумыг нээж, МҮХАҮТ-ын Ерөнхийлөгч Б.Лхагважав: “Монгол–Индонезийн бизнес форумд хүрэлцэн ирсэн та бүхэнд талархал илэрхийлье. Манай хоёр улс 69 жилийн турш найрсаг харилцаагаа тогтвортой өргөжүүлж, улс төр, эдийн засаг, соёлын олон салбарт үр дүнтэй хамтран ажиллаж ирсэн нь өнөөдрийн уулзалтын суурь болж байна. Монгол, Индонез хоёр бүс нутагтаа стратегийн байр суурьтай, асар их эдийн засгийн нөөцтэй улсууд. Сүүлийн жилүүдэд бидний бизнесийн харилцаа бодит ажил, шинэ санаачилгаар бэхжиж, худалдааны эргэлт тогтвортой өсөж байна. Энэ нь цаашид хамтын ажиллагаагаа илүү том түвшинд гаргах боломж бүрдсэнийг харуулж байна. Монгол Улс уул уурхай, хөдөө аж ахуй, эрчим хүч, аялал жуулчлал, технологийн салбарт өргөн нөөцтэй бол Индонез технологи, инноваци, хөрөнгө оруулалтын чиглэлээр АСЕАН-даа манлайлдаг. Халал махнаас эхлээд хүнсний үйлдвэрлэл, тоног төхөөрөмж, логистик, аялал жуулчлал зэрэг өргөн хүрээнд шинэ түншлэл байгуулах боломж биднийг хүлээж байна. МҮХАҮТ хоёр улсын бизнесийн хамтын ажиллагааг бүх түвшинд дэмжиж, хөрөнгө оруулалтын шинэ боломж, шинэ түншлэлийг нээхэд үргэлж бэлэн байх болно" гэдгийг хэллээ. 

Тус форум нь хоёр улсын эдийн засгийн хамтын ажиллагааг шинэ шатанд гаргах, бизнесийн орчны талаарх мэдээлэл солилцох, түншлэл байгуулах зорилготой бөгөөд уул уурхай олборлолт, хөдөө аж ахуй, боловсрол, аялал жуулчлал, эм, эмийн бүтээгдэхүүн, эдийн засаг зэрэг стратегийн чухал салбаруудад хамтын ажиллагаа өргөжүүлэх боломжийг нээлээ.

Сүүлийн жилүүдэд Монгол–Индонезийн худалдааны эргэлт өсөн нэмэгдэж, 2024 онд 51.1 сая ам.доллар, 2025 оны эхний хагас жилд 36.11 сая ам.долларт хүрсэн нь бизнесийн харилцаа тэлж байгааг харуулж байна.

Монголын талаас жонш, ноосон ээрмэл зэрэг бүтээгдэхүүн экспортолж, Индонезийн талаас уул уурхайн техник тоног төхөөрөмж, хүнсний болон өргөн хэрэглээний бараа, дал модны тос, эмийн бүтээгдэхүүн импортлож байна.

Ийнхүү хоёр улсын эдийн засгийн бүтэц харилцан давуу тал нь хөрөнгө оруулалт, худалдааны шинэ боломжуудыг бодитойгоор бий болгож буйг форумын гол илтгэл, хэлэлцүүлгүүд онцоллоо.