Орон нутгийн санаачилгыг дэмжих Канад сангаас зарласан шилдэг төслийн нэгээр ОБЕГ-ын харьяа Ой хээрийн түймрээс урьдчилан сэргийлэх сургалт, судалгаа, туршилт үйлдвэрийн төвийн хэрэгжүүлэх “Ногоон Ирээдүй- Ойн нөхөн сэргээлтэд иргэдийн оролцоог нэмэгдүүлэх нь” төсөл шалгарсан байна. Өнөөдөр тус төслийг хэрэгжүүлэх гэрээнд албан ёсоор гарын үсэг зурж, төслийн үйл ажиллагааг эхлүүллээ. Төслийн гол зорилго орон нутгийн иргэдийн идэвхтэй оролцоог нэмэгдүүлж, ойн нөхөн сэргээлтийг үр дүнтэй хэрэгжүүлэх юм. Үүний хүрээнд:

 Байгаль орчныг хамгаалах тогтвортой тогтолцоог бүрдүүлэх,

 Иргэдийн оролцоог нэмэгдүүлэх сургалт, арга хэмжээ зохион байгуулах,

 Байгууллагын чадавхыг сайжруулах,

 Төслийн хэрэгжилтэд жендерийн тэгш байдлыг хангах зорилт тавьжээ.

Канад сан энэ жил нийт 350 гаруй төслийн саналаас зөвхөн 16 төслийг шалгаруулсан байна. Тэдгээрийн нэг нь энэхүү “Ногоон Ирээдүй” төсөл юм. Канад сан нь 1997 оноос хойш Монгол Улсад орон нутгийн иргэдийн амьжиргааг дэмжих, байгаль орчныг хамгаалах, нийгмийн эмзэг бүлгийг дэмжих чиглэлээр нийт найман сая гаруй канад долларын өртөг бүхий 500 гаруй төслийг хэрэгжүүлж, олон зуун санаачилгыг бодит ажил болгоод байна. Төслийн хэрэгжилт нь ой хээрийн түймрээс урьдчилан сэргийлэх, нөхөн сэргээлтийн ажлыг нэмэгдүүлэхэд иргэдийн идэвх санаачилга ямар чухал болохыг харуулах үлгэр жишээ ажил болно гэж холбогдох байгууллагууд онцолжээ.