Эрдэнэбатын Тэмүүлэн, Цэрэнпунцагийн Санжаачойпэл нарыг цагдан хорих хугацаа дуусна. Нийслэлийн прокурорын газраас тэднийг үргэлжлүүлэн цагдан хорих тухай саналыг Дүүргийн Эрүү, Иргэний хэргийн хялбар ажиллагааны анхан шатны тойргийн шүүхэд хүргүүлжээ. Цагдан хорионы хугацааг сунгах эсэхийг дээрх шүүхэд шийднэ.

Эргэн сануулахад, Эрдэнэбатын Тэмүүлэн, Цэрэнпунцагийн Санжаачойпэл нар “2025 оны долдугаар сарын 18-19-нд шилжих шөнө Сүхбаатар дүүргийн 3 дугаар хорооны нутаг дэвсгэрт үйл ажиллагаа явуулдаг “Канте” шөнийн цэнгээний газрын гадаа талбайд хохирогч Д.С-ын нүүрэн тус газарт нь гараараа цохих, хөлөөрөө өшиглөх зэргээр биед нь бүлэглэн халдаж эрүүл мэндэд нь хохирол учруулсан” гэх хэрэгт холбогдуулан мөрдөн шалгах ажиллагааг явуулж шалгаж буй юм.

Шүүхээс хэрэг бүртгэл, мөрдөн шалгах ажиллагааны үед цугларсан нотлох баримтуудыг үндэслэн сэжигтэн Эрдэнэбатын Тэмүүлэн, Цэрэнпунцагийн Санжаачойпэл нарыг “гэмт хэрэг үйлдсэн гэх хангалттай үндэслэл байгаа” гэх үндэслэл тогтоогдож байх тул 48 цаг саатуулан сэжигтнээр баривчилсан.

• Эрдэнэбатын Тэмүүлэнг сэжигтнээр баривчлах хугацаа 2025 оны долдугаар сарын 22-ны өдрийн 21:40 минутаас,
• Цэрэнпунцагийн Санжаачойпэлийг сэжигтнээр баривчлах хугацаа 2025 оны долдугаар сарын 22-ны өдрийн 22:00 минутаас тус тус дуусна.

Энэ хугацааг дахин сунгах эсэхийг шүүх өнөөдөр шийднэ.