Завхан аймгийн Эрдэнэхайрхан сумаас 3 км зайтай орших, 400 гаруй метр өндөр элсэн манхан дундах Мухартын гол нь манай улсын байгаль дахь хосгүй үзэсгэлэнт тогтцын  нэг юм. Гэсэн ч сүүлийн жилүүдэд аялагчдын хөл хөдөлгөөн, хариуцлагагүй үйлдлүүдээс болж голын экосистем ноцтойгоор алдагдаж байна. Энэ зун гэхэд л Мухартын голыг зорин ирсэн иргэдийн тоо 20 мянгыг аль хэдийн давжээ. Аялагчид голын эхэн хэсэгт орших элсэн манхнаас гулгахдаа байгалийн тогтцыг эвдэж, голын ундарга руу элс нурааж, усны урсцыг багасгасаар байгааг нутгийн иргэд онцолж байна. Харамсалтай нь, энэ бүсэд хяналт тавьж, хамгаалах үүрэгтэй албан хаагчдын тоо аялагчдын урсгалыг давахгүй байгаа юм. Иймд байгаль хамгаалах ажилд иргэд хамтран ажиллах хэрэгтэй байгааг нутгийн иргэд болон байгальд хайртай олон нийт нийгмийн сүлжээгээр дамжуулан анхааруулга, гомдол санал хүргүүлсээр байна.