Ирланд Улсын нийслэл Дублин хотод өнгөрсөн нэгдүгээр сарын 20-ны оройн 21:30 цаг орчимд Монгол Улсын иргэн У-г дээрэмдэж, хүзүү тус газар нь хутгалсан хэрэг гарсан байна. Улмаар иргэн У хэрэг гарсан газрын ойролцоох "Матер" хэмээх эмнэлэгт хүргэгдэн эмчлүүлж байсан ч өвчнөө дийлэлгүй амиа алджээ.

       Уг хэрэгтэй холбогдуулан 14 настай хүүг сэжигтнээр татан Дублин хотын цагдаагийн газарт хориод байна. Хүүгийн нэр болон гэрийн хаягийг нь мэдээгүй бөгөөд сэтгэцийн өвчтэй байж болзошгүй гэж үзэн, сэтгэцийн эмнэлэгт хүргэжээ. Амиа алдсан иргэн У нь 49 настай, Дублин хотод гэр бүлийн хамт суурьшин амьдарч, цэвэрлэгчийн ажил эрхэлдэг байсан болохыг тус улсын цагдаагийн байгууллагаас мэдээллээ.