Үндэсний их баяр наадам өргөн дэлгэр сайхан эхэлж байна.  Гэвч наадмын урт амралтын үеэр бид хөдөө орон нутгийн олноороо зорьдог. Сайны хажуугаар саар гэгчээр наадмын өдрүүдэд согтуугаар жолоо барьж, осолд орсон. Морь, мотоциклоос унаж бэртсэн, архидан согтуурсан үедээ нэгнийхээ биед халдсан хүмүүсээр Гэмтэл согог судлалын үндэсний төв дүүрч, нүд халтирам дүр  төрхтэй болдог нь нууц биш. Автомашины осол, бүх төрлийн уналтын шалтгаант бэртэл гэмтэл, хүүхдийн болон ахуйн хүрээний осол гэмтэл нэмэгддэг.

            Өнгөрсөн оны долдугаар сард л гэхэд  ГССҮТ-ийн яаралтай тусламжийн тасагт нийт 15.588 хүн тусламж үйлчилгээ авчээ. Тодруулбал,  зам тээврийн осол -7823, унаж бэртэх /бүх төрлийн уналт буюу явганаас бүдрэх, ор болон шат, гуу жалга, унаа тэрэг, барилга байгууламжаас унаж бэртсэн/ -42.952,  амьгүй механик хүчин зүйлд өртөх /шил шаазан, хутга мэс болон бусад эд зүйлд өртөж гэмтсэн/ -15.007,   амьтай механик хүчинд зүйлд өртөх /нохой, муур, морь, мал, хүнд хазуулах/ -8114, хүчирхийлэлтэй холбоотой бэртэл гэмтэл /ахуйн хүрээний болон гэр бүлийн маргаан, зодоон цохион, архи дарс хэтрүүлэн хэрэглэснээс үүдэлтэй/ -6570, 2418 хүн халуун дулаан бодист өртөх буюу түлэгдэж гэмтсэн. Мөн  204 хүүхэд, 35 том хүн мориноос унаж бэртсэн гэх харамсалтай тоон мэдээлэл бий.

            Хөдөөгийн малчид эртнээс “Сайн явж ирсэн үү” гэж мэнд мэдэж ирснээс “Хурдан явж ирэв үү” гэдэггүй билээ. Тиймээс хайртай дотнын бүхнээ тээвэрлэж яваа та бүхэн замын хөдөлгөөний дүрмээ ягштал баримталж, болгоомжтой аялаарай. Үүнийг мэддэг хэдий ч сануулгыг нь хайхралгүй яаруу сандруу, хариуцлагагүй, чадваргүй жолооч нараас үүдэн осол гарч байгаа нь харамсалтай. Таны хариуцлагагүй үйлдлээс болж, хэн нэгэн  бэртэж, насаараа хөгжлийн бэрхшээлтэй болж, хөдөлмөрийн чадвараа  алдах. Цаашлаад амиа алдах ч магадлалтай. Ганцхан секундийн  болгоомжгүй, өөртөө итгэлтэй хийсэн үйлдэл тань  харамсаад, уучлалт гуйгаад ч нэмэргүй үр дүнг авчирч болно. Та удаан явсан ч очих газраа хүрнэ. Харин алдсан боломж, амь нас эргэж ирэхгүй.  Тиймээс хариуцлагатай жолооч байхыг уриалж байна.

                Мөн цаг агаарын урьдчилсан мэдээгээр наадмын өдрүүдэд хөдөө, орон нутаг болон нийслэл хотод хэт халалт үргэлжлэх төлөвтэй байгаа боловч 11-12-ны өдрүүдэд түр зуурын усархаг аадар бороо орж болзошгүй.  Хэт халсан өдрүүдэд гол усанд бага насны хүүхдийг оруулахгүй байх, хараа хяналтгүй орхихгүй байх, согтууруулах ундаа хэрэглэсэн, гүн, урсцын ширүүнийг мэдэхгүй гол усанд орохгүй байх, түүнчлэн хийлдэг завь, гудас, тоглоомыг хэрэглэхдээ өөрийн болон бусдын аюулгүй байдлыг хангах үүднээс аврах хантааз бусад шаардлагатай хамгаалах хэрэглэгдэхүүнийг бүрэн өмсөж хэрэглэх. Мөн гол мөрний оргил үе олон жилийн дунджийг давж богино хугацаанд үерлэх эрсдэлтэй байх тул үерийн аюултай бүсэд нутаглаж, оршин сууж байгаа иргэд, малчдыг сэрэмжтэй байж цаг агаарын урьдчилсан мэдээг тогтмол уншиж явахыг мэргэжлийн байгууллагууд сануулж буй.

                Тиймээс хөгшин настай аав, ээж, бага насны хүүхдүүддээ нарнаас хамгаалж, гол усанд орохдоо болгоомжтой байгаарай. Хотоос яаран гарч давхиад л хаа нэг голын захад майхан барьж буудаллана. Тэгээд хэсэг бүлгээрээ архидах үедээ бяцхан хүүхдээ голд алдчихсан харамсалтай мэдээ жилийн жилд л наадмын өдрүүдээр дуулдана. Бид ч хэдхэн өдөр шуугьж байгаад мартчихдаг нь харамсалтай. Саараас сайн нь илүү байж аюулгүй наадаарай.