-Чичирхийлэл одоо хүртэл мэдрэгдсээр байна-

Хөвсгөл аймгийн Ханх суманд өнөөдөр буюу нэгдүгээр сарын 12-ны үүрээр газар хөдөлж, иргэдэд хүчтэй мэдрэгдсэн талаар бид өмнө нь мэдээлсэн. Ханх сумын нөхцөл байдлын талаар тус сумын Засаг дарга Л.Даваабаяраас тодруулахад “Сумын төвөөс 30 гаруй километрийн зайтай Хачмын ам гэх газар 6.8 магнитуд хүчтэй газар хөдөллөө. Газар хөдлөлтийн гол хүч нь тэнд мэдрэгдсэн. 06:34 цагийн үед сумын төвийн айлуудад газар хөдлөлт мэдрэгдэж, ЗДТГ, цэцэрлэг, сургууль, дотуур байрны хана цуурч, тааз нурсан. Мөн айлуудын цонх хагарлаа. Хачмын амнаас 10 гаруй километрийн зайтай өвөлжиж байгаа айлуудын бүх шилэн эдлэл, аяга таваг хагарч, гэрийнх нь хаалга салж, малын хашаа, зуны байшин нь нурсан  байна. Сумын хэмжээнд одоо ч чичирхийлэл мэдэгдэж байгаа учраас төрийн албан хаагчид өнөөдөр ажиллахгүй. Зөвхөн сумын онцгой коммисынхон айлын байшинд гал түлээд, байдлыг ажиглаж байна. Тамгын газрын байр цуурч, газар хөдлөлтөд нурж магадгүй байгаа учраас айдастай байна. Газар хөдлөлт, чичирхийлэл бүтэн өдрийн турш үргэлжлэх магадлалтай байгаа. Хачмын аманд Хөвсгөл аймгийн Ренчинлхүмбэ сумын малчид отроор өвөлждөг” гэлээ.