Хавдар судлалын үндэсний төвийн хоёр эмчээс коронавирусийн халдвар илрээд байгаа. Мөн нэг сувилагчийн шинжилгээний хариу эргэлзээтэй гарсан хэмээж буй. Тус эмнэлэг 600 гаруй эмч, ажилтантай бөгөөд 324 эмч, ажилтнаас тандалт, урьдчилан сэргийлэх зорилгоор коронавирусийн түргэвчилсэн шинжилгээ авахад ийн халдвар илэрсэн юм. 

 

Тэгвэл дээрх эмч, ажилтнуудын шинжилгээний хариу гарах хүртэл ХСҮТ  үйлчлүүлэгч хүлээн авах боломжгүй гэдгээ мэдэгджээ. Улмаар эмнэлэгт хэвтэн эмчлүүлж байгаа өвчтөн болон эмнэлгийн ажилчдыг тусгаарлаад байна. Гэхдээ PCR-ийн шинжилгээгээр дээрх эмч, сувилагч нар коронавирусийн халдвар авсан нь батлагдвал тус эмнэлгийн эмч, ажилтнуудыг тэр чигт нь хавьтал гэж үзэж, тусгаарлах уу, эсвэл үйл ажиллагааг нь хэвийн үргэлжлүүлэх үү гэдэг асуулт олны дунд үүсээд байгаа юм. Тиймээс энэ талаар ХСҮТ-ийн цахим мэдээллийн мэргэжилтэнтэй холбогдож тодруулахад “Манай эмнэлэгт батлагдсан тохиолдол байхгүй. Сэжигтэй тохиолдол бүртгэгдсэн нь үнэн. Иймд тухайн хэсэгт халдваргүйтгэл, ариутгал хийсэн, хариугаа хүлээгээд байж байна. Манай эмнэлгийнхэнд өчигдөр шинжилгээ хийж эхэлсэн. Үлдсэн 300 орчим ажилтан, тухайн тасгаар үйлчлүүлсэн иргэдээс шинжилгээ авах ажлыг зохион байгуулж байгаа. Хуваарь гаргачихсан байна лээ. Одоо бол эмнэлгээс орох, гарах хөдөлгөөний хязгаарласан байна. Мөн эмнэлгийн бүх хэсэгт ариутгал, халдаргүйтгэл хийчихсэн. Үүнээс илүү мэдээлэл өгөх боломжгүй” гэв.