Улсын онцгой комисс, Засгийн газрын ээлжит хуралдаан энэ сарын 21-нд болж, Баянзүрх дүүргээс голомттой халдварын тархалтыг тогтоон барих зорилгоор нийслэлд арванхоёрдугаар сарын 23-ны өдрөөс эхлэн 2021 оны нэгдүгээр сарын 6-ныг хүртэл хатуу хөл хорио тогтоохоор болсон билээ. Гэсэн хэдий ч иргэд орон нутаг руу явах боломжтой эсэх талаар асуусаар байгаа юм.

Зөвхөн хүнс, шатахуун, өвс тэжээл, эм, эмнэлгийн хэрэгсэл ачсан авто тээврийн хэрэгслийн жолооч, албан томилолт, буяны ажилд оролцох зэрэг хүндэтгэх шалтгаантай иргэд коронавирусийн шинжилгээний маягттайгаар хотоос гарч болно

Иймээс энэ талаар Тээврийн цагдаагийн албаны Урьдчилан сэргийлэх хэлтсийн зохицуулагч, цагдаагийн ахмад Б.Зоригоогоос тодруулахад “Нийслэлээс гарах хөдөлгөөнийг бүрэн хаасан байгаа. Зөвхөн хүнс, шатахуун, өвс тэжээл, эм, эмнэлгийн хэрэгсэл ачсан авто тээврийн хэрэгслийн жолооч, албан томилолт, буяны ажилд оролцох зэрэг хүндэтгэх шалтгаантай иргэд коронавирусийн шинжилгээний маягттайгаар хотоос гарч болно. Бусад тохиолдолд орох, гарах хөдөлгөөнийг бүрэн хязгаарлаад байгаа. Энэ журам хөл хорио тогтоосон үед буюу энэ сарын 23-наас ирэх нэгдүгээр сарын 6-ныг хүртэл мөрдөгдөнө. Өөрөөр хэлбэл, ирэх нэгдүгээр сарын 6-ныг хүртэл орон нутгийн иргэдийг хотоос гаргахгүй” гэв.