УИХ-ын гишүүн Б.Пүрэвдорж, Ж.Батсуурь, А.Адъяасүрэн  нар "Эрдэнэт үйлдвэр"-ийн 20 хувийг иргэдэд эзэмшүүлж, 20 хувийг худалдах тогтоолын төсөл өргөн барилаа. Төслийн талаар Б.Пүрэвдорж гишүүн мэдээлэл хийлээ.

    Тэрбээр “Бид гурав санаачлаад “Эрдэнэт үйлдвэр"-ийн газрын 40 хувийн 20 хувийг ард иргэдэд үнэгүй эзэмшүүлэх, үлдсэн 20 хувийг ААН-д нэрлэсэн үнээр борлуулж, эзэмшүүлэх тогтоолын төслийг боловсруулж, өргөн барилаа. Үндсэн хуулийн зургаад бол стратегийн ач холбогдол бүхий ордыг ашиглахдаа баялаг ард түмний мэдэлд байна гэсэн зарчмын дагуу ард иргэд хяналт тавих үндсэн дээр илүү орлого олох тэр боломжийг бий болгож энэ тогтоолын төсөл өргөн баригдсан. Сүүлийн үед олон хулгай гарсан. Хэдийгээр эрх баригчид ярьж байгаа боловч бүгдээрээ хад мөргөөд зогсож байгаа. Учир нь эрх баригчдын цүнх барьсан залуус төрийн өмчийн томоохон компани дээр очиж, хулгай хийж, хамтарч компани хоосолдог үйлдэл олон байна. Энэ хулгайг хязгаарлахын тулд ард түмний хяналтыг оруулах зайлшгүй шаардлагатай байна. Ард түмний хяналт орж ирснээр төрөөс хулгай хийдэг байдал буурна гэж төлөвлөсөн. Энэ тогтоолын төсөл амжилттай хэрэгжвэл бусад 30 гаруй төрийн томоохон компаниудад ард иргэд болон ААН-үүд  хувь эзэмшүүлэх замаар хяналт тавих боломжийг бүрдүүлнэ" гэв.