Цахим сүлжээнд “Модон хэвийн боов худалдаална" гэсэн зар тавигдсан билээ. Тус модон хэвийн боовыг хувиараа хөдөлмөр эрхлэгч, мужаан Х.Ганбаяр үйлдвэрлэжээ. Түүнтэй холбогдож яагаад модон хэвийн боов хийх болсон талаар тодрууллаа.

Тэрбээр “Үзэсгэлэн худалдаанд гардаг, аялал жуулчлалын үйл ажиллагаа явуулдаг байгууллагуудад зориулж  үзмэр болгох гэж модон хэвийн боов хийсэн. Энгийн хэвийн боов үзэсгэлэн худалдаанд гарахад хугарах, муудах нь амархан байдаг учраас модоор хийх санаа төрсөн. Цахим сүлжээнд мэдээ оруулснаас хойш аялал жуулчлалын баазтай хүмүүс залгаж, мэдээлэл авч байна. Одоогоор захиалга авч, худалдаалаагүй байна. Нэг модон хэвийн боов хийхэд 30 минутаас нэг цаг хугацаа шаардлагатай юм билээ. Харин хатаахад 12 цаг болдог. Цахим сүлжээнд модон хэвийн үйлдвэрлэж байгааг хүмүүс их шүүмжилсэн байна лээ. Би заавал модон хэвийн боовоор тавгийн идээ зас гээгүй шүү дээ. Үзмэрийн зориулалтаар байнга хэрэглэдэг хүмүүст  зориулж хийсэн” гэв.