Монгол Улс болон ХБНГУ-ын Засгийн газар хоорондын хэлэлцээрийн хүрээнд БОАЖЯ-ны хэрэгжүүлж буй “Биологийн олон янз байдлыг хамгаалах, уур амьсгалын өөрчлөлтөд дасан зохицох” төслийн II/III үе шатны хүрээнд Увс, Баян-Өлгий, Ховд, Говь-Алтай, Баянхонгор аймгуудын БОАЖГ болон ТХГН-ийн хамгаалалтын захиргаадын 220 байгаль хамгаалагчийг эрүүл мэндийн урьдчилан сэргийлэх үзлэг, хөдөлмөрийн аюулгүй байдал, эрүүл ахуйн сургалтад хамруулахаар ажиллаж байна. 

    Энэхүү сургалт, эрүүл мэндийн үзлэгийг өнөөдөр Увс аймагт зохион байгуулсан бөгөөд 50 орчим байгаль хамгаалагчид хамрагдаад байна.

Байгаль хамгаалагч нь хариуцсан нутаг дэвсгэртээ байгаль орчны бодлого, хууль тогтоомж, тогтоол, шийдвэрийн биелэлтийг хангуулах, удирдлагыг мэдээ мэдээллээр хангах, менежментийн төлөвлөгөөнд тусгагдсан ажлыг хийж гүйцэтгэх, байгаль орчны учирч болзошгүй аюулаас сэргийлэх, биологийн олон янз байдлын мэдээ цуглуулах, мэдээллийн санд бүртгэлжүүлэх, олон нийтэд байгаль орчны бодлого, хууль тогтоомжийг сурталчлах, байгаль орчныг хамгаалах ажиллагаанд нутгийн ард иргэдийг татан оролцуулах өргөн хүрээний ажлыг хийж гүйцэтгэдэг болно.

         Эдгээр үндсэн чиг үүргээс гадна аялагч жуулчдын аюулгүй байдлыг хангах, гэмт хэрэг, гал түймэр, үер усны аюулын үед онцгой байдлын алба болон цагдаагийн газартай хамтран ажиллах, газарчлах, дэмжлэг үзүүлэх зэрэг бусад ажил үүргийг хийж байна. Ажил үүргээ гүйцэтгэх явцад хөдөлмөр хамгаалал, аюулгүй ажиллагааны дүрэм, зааврыг мөрдөөгүйгээс халдлагад өртөх, гэмтэл бэртэл авах, осолд орох, амь насаа алдах зэрэг асуудлууд байгаа нь “Эрсдэлийн үнэлгээ”-ээр тогтоогдсон. Иймд “Биологийн олон янз байдлыг хамгаалах, уур амьсгалын өөрчлөлтөд дасан зохицох” төслийн хүрээнд энэхүү сургалтыг зохион байгуулж байгаа бөгөөд эрүүл мэндийн үзлэг шинжилгээнд хамрагдсанаар дараах үр дүнгүүд гарна.

Үүнд:

• Байгаль хамгаалагчдын ХАБЭА-н хууль эрх зүйн ойлголт сайжирч мэдлэг дээшилнэ,
• Байгаль хамгаалагчдын ажиллах орчны сөрөг хүчин зүйлсийг бууруулах, осол, гэмтэл, бусад эрсдлээс сэргийлэх хөдөлмөрийн аюулгүй байдлыг сахих мэдлэг чадвар олгогдож, яаралтай үед өөрийгөө болон бусдыг авран хамгаалах тусламж үзүүлэх арга барилд суралцана,
• Эрүүл мэндийн үзлэг, шинжилгээний дүнд зонхилох болон ажил мэргэжлээс шалтгаалсан өвчлөлийг илрүүлэн урьдчилан сэргийлэх арга хэмжээг авч, цаашид  тандалт судалгааг хийх ажлыг эхлүүлнэ,
• Байгаль хамгаалагчдыг ХАБЭА-н хууль эрх зүйн болон бусад мэдээллээр хангасан гарын авлагаар хангана,
• Байгаль хамгаалагчдад тулгамдаж буй асуудлуудыг тодорхойлж, цаашид авах арга хэмжээний санал хүргүүлэх, шийдвэрлэх  ажил төлөвлөгдөнө.