Тулгар төрийн 2230, 2231, Их Монгол Улсын 815, 816, Үндэсний эрх чөлөө, Тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадам эхэллээ. Энэ үеэр наадмын үйл ажиллагааг нээж Монгол Улсын Ерөнхийлөгч У.Хүрэлсүх үг хэллээ.

Тэрбээр “Бүрэн эрхт Монгол Улсын эрх чөлөөт ард иргэд ээ,
Дэлхий даяар тархан суугаа монгол ахан дүүс ээ,
Эзэнт гүрний гал голомт манай сайхан оронд морилон ирсэн эрхэм хүндэт зочид оо
Эрхэм хүндэт наадамчид аа, Их Монгол Улс байгуулагдсаны 815, 816, Үндэсний эрх чөлөө тусгаар тогтнолоо сэргээн мандуулсны 110, 111, Ардын хувьсгалын түүхт 100, 101, Эзэн богд Чингис хааны мэндэлсний 860 жилийн ойг хамтатган тэмдэглэж байна.   Өвөг дээдсээс өвлөгдөн ирсэн үндэсний их баяр наадам бол Монгол төрийн оршин тогтнох, тусгаар тогтнол, бэлгэдэл, Монгол үндэстний эв нэгдэл, эрх чөлөө, түүх, үнэт зүйл, өв соёл, оюуны санаа охь шим, үнэт өв билээ. Эрхэм хүндэд наадамчдаа 1911 оны үндэсний эрх чөлөө, тусгаар тогтнолын төлөөх тэмцэл 1921 оны ардын хувьсгалын үр дүнд харийн эзлэн түрэмгийлэгчдээс эх орноо  чөлөөлж, тусгаар тогтносон ардын засгийн анхны наадмаа хийснээс хойш эдүгээ нэгэн зууныг үджээ. Өнгөрсөн 100 жил улс орныхоо тусгаар тогтнол, бүрэн эрхэт байдлыг бататган бэхжүүлж, дэлхий дахин аа хүлээн зөвшөөрөгдөж, орчин цагийн  ардчилсан Монгол Улсыг цогцлоон байгуулсан тусгаар тогтнол, хөгжил дэвшлийн аугаа зуун байлаа. Цаашид төр улсаа улам бэхжүүлж, эдийн засгийн тусгаар тогтнол аюулгүй байдлаа ханган хөгжил дэвшлээрээ хүн төрөлхтөнд үнэлэгдсэн хүчирхэг Монгол Улс болж хөгжихийн төлөө ард нийтээрээ хамтдаа зүтгэцгээе" гэв.