Ардчилсан намын XIV их хурал өнгөрсөн долоо хоногт болсон. Энэ үеэр Ардчилсан намын гишүүн Д.Алтанхуяг С.Эрдэнэтэй маргалдаж, түүнийг зодож буй бичлэг олон нийтийн сүлжээгээр ил болж байв. Тухайн үед Ардчилсан намын хуулийн зөвлөх Г.Батбаяр   “Ардчилсан намын гишүүн Д.Алтанхуяг С. Эрдэнийн амь нас, эрүүл мэндэд халдахаар дайрч, олон нийтийн газар зүй зохисгүй үйлдэл гаргаж, үл хүндэтгэсэн. Энэ нь Эрүүгийн хуулийн 10.1.2 дахь хэсэгт зааснаар өс хонзон, хувийн таарамжгүй харилцааны улмаас бусдын амийг хөнөөхөөр завдсан төрлийн зүйл, ангид орж байгаа юм. Учир нь түүний биенээс хутга, мэс гарсан. Үүнийг цагдаа нар баримтжуулж, 48 цагийн хугацаатай цагдан хорьсон. Сүхбаатар дүүргийн Цагдаагийн нэгдүгээр хэлтсээс хуульд заасан журмын дагуу хэрэг бүртгэл нээж ажиллаж байгаа. Үүнээс гадна 2-3 иргэний биед халдсан байгаа. Тэдний шүүх эмнэлгийн дүгнэлт гарсны дараа ямар зүйл ангиар яллагдах нь тодорхой болно” гэж байсан.

     Дээрх хэргийг хэрхэн шийдэж буй талаар холбогдох хуульчаас тодрууллаа. Тэрбээр “Д.Алтанхуягийн хэргийг шалгаж дуустал хилээр зөрчих хөдөлгөөний хязгаарлаж, С.Эрдэнэ болон холбогдох хүмүүстэй уулзахыг хориглосон. Д.Алтанхуяг санаатайгаар бусдын биед халдахаар завдаж, оймсныхоо түрүүнд хутга хийчихсэн байсан. Мөн С.Эрдэнийг зангианаас нь чирсэн. Энэ нь түүний аминд хүрэхээр завдсан зүйл ангид орж байгаа юм. Зангиа нь тасарсан тулдаа С.Эрдэнэ амьд гарсан” гэлээ.