Өмнөговь аймгийн Цогтцэций сумын Иргэдийн төлөөлөгчдийн хурлын тогтоолоор “Дархан бэр” тэмдэг олгох тухай журмыг шинэчлэн баталсан байна. Тодруулбал, “Анх бэр болж очсон айлдаа гурваас дээш хүү дараалан төрүүлж өсгөсөн бөгөөд бага хүү нь нэг нас хүрсэн байх. Мөн охин төрүүлсэн бол тооцохгүй” гэж шаарджээ. Тус сумын ИТХ-аас гаргасан журмыг иргэд шүүмжилж,  “Хүний эрх зөрчсөн, хүйсээр ялгаварлан гадуурхсан” хэмээж байгаа юм. Тус журмыг хэрхэн баталсан талаар Цогтцэций сумын Иргэдийн төлөөлөгчдийн хурлын дарга Ц.Доржсүрэнгээс тодрууллаа.

     Тэрбээр “Манай улс “Дархан бэр”-ийг тодорхойлж  энгэрийн тэмдэг олгоод 10-аад жил болж байна. Манай сум энэ жил тус журмыг шинэчлэн баталсан нь үнэн. Ингэхдээ иргэдийн санал, хүсэлтийн дагуу тус журмыг баталж, хэрэгжүүлэхээр болсон. Өнгөрсөн онд “Дархан бэр” тэмдэг олгоогүй. Тиймээс энэ жил “Дархан бэр” тэмдэг олгож өгөөч" гэх санал, хүсэлт 20 гаруй иргэнээс ирсэн. Тэдний хүсэлтийн дагуу ИХТ-аар хэлэлцэж, тус журмыг шинэчлэн баталсан юм. Хэрэв хүний эрхийн байгууллага болон сумын иргэд тус журмыг “Хүний эрх зөрчсөн, хүйсээр ялгаварлан гадуурхсан” гэж үзвэл журмыг хэрэгжүүлэхгүй, цуцалж болно. Бид энэ асуудлаар дараагийн хурлаар дахин хэлэлцэж, ярилцана” гэлээ.