-Ганцмод боомтод очоод шинжилгээ өгсөн зургаан жолоочийн шинжилгээний хариу эерэг гарсан-

Зам, тээвэр хөгжлийн сайд Л.Халтар цаг үеийн асуудлаар мэдээлэл өглөө.

Тэрбээр “Өнөөдөр Гадаад харилцааны дэд сайд Замын-Үүдэд очсон. Гадаад харилцааны дэд сайд Эрээн дэх консулын газрынхантай, цааш нь БНХАУ-ын талтай холбогдож байгаа байх. Үдээс хойш тодорхой чиглэл гарна гэж найдаж байна.

          Нөгөө талаас “Хилийн боомтууд дээрх халдварын дэглэмээ чангатгаж, аль болох халдваргүй, ногоон бүс болгох тал дээр анхаараачээ” гэсэн шаардлагыг удаа дараа тавьсан. Харамсалтай нь манай талаас хилийн боомтуудаа ногоон бүс байлгаж чадаагүй. Цаашид бид ч гэсэн зүгээр суулгүй хилийн боомтууд дээрээ халдвар хамгааллын дэглэмийг сайтар сахих ёстой.

          Дундын бүсэд байгуулсан чингэлгийг талбай нь 50 орчим чингэлгийн багтаамжтай. Энэ бол эхний шатных. Цаашдаа байнгын тээвэр эхэлбэл 50 чингэлгээр эхэлнэ гэсэн үг. Ингээд эхлэхээр хоёр талаас техник, тоног төхөөрөмжийн хувьд нэмэх шаардлага байгаа эсэхийг харна. Олон хоног ярьсан учраас БНХАУ-ын талаас хоёр чингэлэг орж ирж байгаа.

          Одоо Гашуунсухайт боомтын хувьд ч гэсэн хүнд нөхцөл байдал үүсээд байна. Ганцмод боомтод очоод шинжилгээ өгсөн зургаан жолоочийн шинжилгээний хариу эерэг гарсан. Нөхцөл байдлаас хамаарч, БНХАУ-ын талаас ямар шийдвэр гаргах нь тодорхой биш байна. Гадаад харилцааны яамаар дамжуулан албан мэдээлэл ирэх байх” хэмээсэн юм.